今日天氣好到啊......落大雨......

打個電話俾阿暉，先知道佢哋要去送台灣人，我仲諗住問佢哋去唔去添......

之後由運動場一直走到去機場，期間睇到唔少嘢，經過巴士車房仲有種衝動想去揸架去機場。

不過良心㩒住咗自己，算啦。

好彩冇遲到，唔係我真係大鑊。

過一陣，有架車嚟到，落咗好多自己識嘅台灣朋友。第一件事梗係上前擁抱啦。

大家有講有笑，好彩麥大姐幫我哋買咗手信俾佢哋，唔係就唔知點收科。

之後我哋帶咗佢哋去威尼斯人，超爽。

仲撞到涵哥佢哋。

玩玩吓，六點幾，係時候走啦，唔係遲咗......死。

不過都趕得切返去，我哋交返啲人之後，就同佢哋say goodbye。

最後佢哋真係過咗離境之後，我哋先至走。

講真，我第一次真正體驗機場離別嘅感覺。

就好似未返之前同香港人喺廣州道別一樣。

我喺架回程車上沉默一樣，喊都喊唔出。

而家陣都係一樣，喊都喊唔出。

不過我諗最慘嘅都係宏哥，走咗個女朋友。