今日用番廣東話。=_+
成兩個星期都無更過博, 寫文數目不減反增。萬惡嘅語文, 英文作業, 加上"感恩節", 單單開學以來三個星期大大小小已經寫咗8~9篇文。
有時真係有啲佩服自己, 點可以寫咁多文。
至於無更博嘅原因嘛...個人覺得想講嘅積太多, 又耐無寫, 反而想寫嘅九成唔記得曬, 於是懶得寫啦...
陋習, 陋習。不過又唔係話改就改...
咁...Let's get started.
幾堂電腦堂(唔知點解一直都想叫電腦堂做CP...), 好似都無乜點好玩。發下小牢騷先。
都講到嚟變數啦, 仲唔教宣告, 資料型別。跟住落嚟三堂以內仲唔教我又要寫多個服字。教壞細路呀大哥...
唔講遠嘢, 講啲近啲啦。星期六收尾一堂之前, 大家都知咩事...大佬標(傻標?喪標?)發爛渣。發爛渣不特止, 仲飛書。
連續避過兩本飛書嗰位實在太值得景仰啦。畢竟人哋係兩手插袋, 毫無準備都避到吖嘛。
後尾點? 大佬標喺Ben哥講嘢之際, 深情款款捉住嗰位避書大俠雙手, 連聲道"對不起", 好似仲有求婚字句。
Ben哥講嘢好有道理。不過早就揀咗文, 無理由改。雖然唔鍾意背嘢, 之但係無得揀。
唔通日日對住啲千奇百怪嘅符號同時又寫出一大堆千奇百怪嘅答案咩。你唔癲, 我都癲。起碼文科啲嘢都仲有"少少"意義。
講起意義, 突然之間諗起我啲小說。究竟我篇小說想講咩, 到家都仲未有個定案。莫非又係情情塌塌嗰啲
有人話創作世界系嘅都有啲中二病。我好似都有啲症狀...醫生, 有冇得醫吖...
家陣嘅我應該中咗"學習集中力衰退症候群", 而且應該到咗中晚期。
上課唔聽書, 想瞓覺, 做自己嘢, 發白日夢...乜都有齊。醫生, 究竟有冇得醫吖...
*EDIT: 呃, 大概仲要加上"自暴自棄綜合徵"...*
寫咁耐博文, 除咗某段時間發咗陣癲之外都無乜點試過寫到咁無組織。
唉, 就咁多先。下次都唔知到幾時。
|
