今日起身返學，落到樓下望住個鐘，好似唔多對路
再望下電話個鐘，原來我搞慢左半個鐘(本身諗住搞快半個鐘)
跑到樓下等車，心諗實遲到，的士站又排長龍
再望下見到排最前頭個個係隔離學校董玉娣的學生
於是我就好厚臉皮咁走過去叫佢，問佢可唔可以一齊搭的士
佢即刻退後左幾步，我諗我嚇親左人
落車，漏低左部電話，佢即刻跑過來比返我Orz
跑返學校，見到個老師，佢同我say hi
我真係就快遲到，所以無理佢跑左上樓
食完飯再上樓，見返同一個老師，佢又同我say hi
我點一點頭行過，即刻比佢拉住左
佢問我係唔係唔識同人打招乎，成日都成個憤怒青年咁樣，叫我改善
又話好多老師都咁講我
或者會有人覺得我成日都黑口黑面，唔多友善
但我本身個樣就係咁，我唔想為左人地的睇法而去改變自己
而且，識落的人就自自然然會知道我係一個點樣的人
與其咁留意我外表，不如多留意我平時份人係點.....
老實講，我覺得我好正常，當然我點都唔會對住個老師當面講
「其實我覺得我無咩問題，我覺得我好正常，我唔介意其他人點從外表睇我」
咁我有時候磪實係會令到人有所誤會，但呢種誤會又未至於去到要去刻意解釋的地步
或者佢想我出到來社會唔想咁樣而比人鬧，但係我又唔係返工，我返緊學
次次見親佢都要比佢拉住來話
「表情」，「態度」，「外表」，「打招呼」，「言語」，「思想」
我咩都有問題，咁你不如當我唔存在算數啦唉
完全唔想再理其他人點睇我
做人真係好煩，無論我做咩，永遠都係錯
放學見同個舊老師傾閒計，話個中文老師同佢講，我係班入面最有機會拎中文5*
聽到當然開心，但拎唔拎到就真係另一回事，到時拎個1返來就好笑，努力啦，哈哈
返屋企半路，見到之前成日去送外賣的地方
諗起好多人同事，諗起我成日同D商戶傾下計，望下女仔
......
返工雖然辛苦，但對比起讀書
返工係肉體上的辛苦
但心靈上的辛苦呢？
我出來工作時間少，唔可以太過妄斷
但至起碼
我返工的時候的心，比起返學時舒服暢快得多
或者我係對人唔係對事
但我真係好唔鐘意做咩都比人話我有問題
或者我真係好有問題
但我覺得我無問題，如果真係有心，咁不如比我撞下板，流下血先再來扶我....
做人真係好煩
我真係好念舊，呢排成日都諗起以前的人同事
過左去，由得佢，隨遇而安，我都知要咁做
但有時候
總係會不自覺地將某D影像與往事重疊......
| 
