今時今日，想在office搵另一半，難過登天，因為身邊正常少少的男同事，好多都名草有主。臨近情人節，office瀰漫住低吟的討論聲，搲頭嘆氣聲一傳出，我就知道，情人節來了。
可能係女性敏感觸覺同埋我天生順風耳，我聽到對面兩位男同事好苦惱…
男同事甲：「我諗唔到果日食乜好？有冇推介，唔想太貴，最好人頭百幾二百蚊搞掂。」
男同事乙：「我都煩緊，之前同女友講掂數，明明話屋企自己煮，慳錢又浪漫。最後佢反口，又話唔想在家食，煩死。最後book咗樓下間cafe，價錢都合理。」
甲：「我仲有禮物要煩，唔知送咩好，上次聖誕節，佢求其買左盒朱古力俾我，我其實有啲嬲。」
乙：「咁你送咩俾佢？」
甲自豪表示：「我送咗把梳。」
梳？鑲金架？
「係一把韓國出產的梳，好受時下女性歡迎。比一般梳更容易梳，頭髮唔會輕易打叉。（下刪數百字）」
乙：「咁你呢樣禮物又真係比送朱古力有誠意，難怪你嬲。」
聽到呢度，我不自覺咁戴番起個earphone，暗自舒了口氣，慶幸自己未有傻到在office覓食，因為周圍都係毒男。
我同你唔係老夫老妻，唔嚮往慳錢的浪漫；你亦唔係女人，唔使懶體貼幫我揀梳。
情人節，可怕嘅並唔係一個人，而係要對住一個不解溫柔嘅人。
更多迷你倉，倉
|
