我之前寫過，女朋友係男朋友嘅一面鏡，喺女朋友身上，會清晰咁反映出男友對佢好唔好。
但原來要令人一睇就知你女朋友幸福，「反映」只係第一步，你係可以主動咁「投影」。
好似好複雜，但幸福從來都簡單，畀一分鐘我，慢慢解釋你聽⋯⋯
記住呢句－「只係你對女朋友係女神，佢就係女神。」
就係咁簡單？
聽落容易，但要成世咁實行，其實好難。
因為拍拖會好多磨擦，每鬧多一次交，每次佢大聲鬧你，你就會覺得：「妳真係好黑我憎！」
因為時間會令佢變老，佢冇可能會成世青春，但你嘅眼球自動導航去其他仍然青春嘅女仔身上，你就會覺得：「原來佢已經唔可愛。」
因為久而久之，你習慣咗佢喺你身邊。佢唔再係當初你熱切追求、每次約會都預備到十足十、周不時都畀驚喜嗰一位女神，依家只係變成咗一個又長氣又煩、幫你執頭執尾、叫你呢樣嗰樣、塊面又黃嘅煮飯婆。
好殘酷，青春對女人嚟講真係好殘酷，所以男朋友/老公先一定要更加對佢哋好啲。因為，佢哋嘅青春就係付出喺我哋身上，每過一日就多一日，冇得話老套，因為係事實。
但我女朋友成日都話：「要令我幸福好簡單。唔係錢。」
平日求求其其，食魚蛋少冇所謂，但間中搵日好隆重咁，一齊著靚啲咁食餐飯，成晚約會由你安排。
可能你唔鐘意影相，但佢睇到人哋影啲好Sweet嘅相都會好羨慕，唔好理港唔港女喇，影咗先算啦，第日睇返，都係回憶。
女朋友，永遠都想成為你嘅最好，但乜嘢叫最好？講靚，實有人靚啲；講身材，點都唔夠你睇開嘅AV，講性格，你又話佢煩⋯⋯
其實，「最好」係唔使有標準，唔需要定義，你講就得，你話佢係最好，佢就會覺得自己係最好。
因為，點解要好？都係為咗你。
佢嘅自信，一半嚟自佢自己，一半係嚟自你。
所以，乜都唔好理，依家即刻同佢講句：「Hello，女神！」
佢會即刻笑出嚟。
更多迷你倉，倉
|
