(前言：舊網誌一篇，唔需要深究當中0既人物關係，只希望仍然帶著愛情煩惱0既朋友都0係當中搵到一句半句0既共鳴，甚至你可以當成《感動的...》系列愛情篇去睇)

今明兩日有難得兩日假期，但一陣都要打學科會議紀錄同出短講題目。以前做學生，從來唔會知道老師要為開學日準備好多野，只係hehe 哈哈又過幾粒鐘，愈快走愈快可以出去蒲／返歸。今日坐０係教員室，深刻感受到要為學生作嫁衣裳，係一件殊不簡單０既工作。

將(註：我前度男友)誤會喇，易拎最近蘊釀轉工，打算做到九月底，之後轉做細鋪仔sales，將或者好奇怪易拎點解會甘心收番低人工做細鋪sales，但阿咩相信佢會向做開鋪做生意既方向進發，都好，熟識一下鋪頭平日運作都係裨益日後開鋪。咩(註：我)唯一擔心佢仍然係佢同路易士０既關係。最近，易拎將自己收埋，去睇一大堆情緒管理０既書，之前佢有位朋友都同獅子座男友分手，佢對住佢朋友，對住我，都引導我地去正面思考，但佢俾咩感覺係不斷用不同理論去抑壓自己個計時炸彈。面對路易士邀約，以前佢會好開心傾去邊去邊，依家好多時用語調好平淡咁推，又或者裝得好cool咁應承住先。上一回係blog提到佢去同路易士嘈，原來路易士見易拎冷淡左咁多日，於是打算九月搵一日設計一大堆節目乙水易拎開心。

尋日，同易拎一齊食意粉，易拎問咩

「男人係咪都係咁犯賤？愈有挑戰，愈有難度既先肯搏命要得到佢？」

「你其實係咪想問獅子座男人係咪就係呢種本性？」咩明白，佢同時面對３個獅子座男士０既問題，內心難免有好大衝擊。

「其實你好了解佢係咩人，依家亦搵到方法點先令到佢緊張你多０的。不過我唔覺得你因為咁樣而開心」

「Cammy,我無辦法呀。我唔想扮cool去迎合佢喜歡０既形象，我都知道大家都愛對方，但佢唔接受我好熱情咁對佢，佢會完全唔理我。到我冷淡，佢往往先走黎緊張。你追我逐，好辛苦，我唔係想咁呀Cammy。」

阿咩同易拎講番facebook果篇《神探的鬼》筆記，易拎本質同好多人一樣：小女人，少少懶，貪靚，喜歡享樂，但正正因為得唔到重視０既人認同，愛情中０既現實令佢原本人格逐漸消失，為左生存，去產生一隻又一隻０既「鬼」，築起愈來愈高既圍牆，令自己守０係圍牆之內安安全全。但，人本身０既怯懦同脆弱本性往往係承受唔到咁高既圍牆，最終，自我毀滅，只係差在圍牆內定圍牆外，抱住「鬼」／放棄「鬼」，無聲／轟烈咁毀滅。

阿咩，亦曾經製造「鬼」，築起圍牆。近一個月前，將咩分手時，咩情緒陷入失控，加埋疾病壓力，但唔可以對易拎以外既人透露半句，咩將自己鎖０係房度，抱住大大咪一時自言自語，一時流住眼淚睇將俾咩既file，一時瞪住眼望住無開燈０既房。要見人時，花上好大力量抑壓住所有傷同痛，平靜咁食飯，睇電視，出街。出到街，見到一雙一對既人，內心就充滿仇恨，假如當時有軍刀在手，咩絕對會夠膽一個一個咁殺，阿咩０係呢段日子不斷製造一隻隻「鬼」，暴力，嫉妒，咀咒，壞心眼．．．內心不斷建築一度度牆，唔呼天搶地，０係人前咩需要別人面前生存，呢０的統統都成為咩０既面具。

直到有一晚，將同咩講左一句：「我唔要我第時０的仔女係醜樣同有病」，之後將就趕阿咩收線去訓覺。果晚，咩企０係窗邊，從此無再喊過，因為咩已經俾最愛既將傷左自尊，傷左作為女人既自尊。

（續）