一個要去「飲嘢」,原因會唔會係由於我哋強迫自己朝九晚六維持「清醒」, 日復日虛耗心神、體力,偶而覺得攰同氣餒,就將酒精充當催化劑,令自己脱離偽裝嘅「清醒」狀態.飮嘢,唔完全係由於口渴,只不過係人類虛偽得太耐,需要釋放自己平衡心理,甚或至透過酒醉搵返「自己」.
好多人講過，人要活在當下,及時行樂。有咩唔開心唔如意,飲啦!日抖我哋面對成千上萬嘅繁瑣事務,可惜,事情不但未必解決得到,亦會令我哋偽裝嘅「清醒」步向崩潰邊緣.酒醉後嘅世界睇落虛無空洞,但正因為呢種虛無容易令人冇辦法繼續(扮)清醒,換個角度睇吓呢個世界,事情或能夠輕易得到解決.
見到0的飲醉酒嘅人經常問其他人「我貓咗未」,並非由於佢哋驚酒後失儀,而係佢哋經已失去醉同不醉嘅觀念--「醉」「冇醉」根本只屬physical層面.「酒後吐真言」之所以冇俾人改叫做「醉後吐真言」,係由於人類生存咗幾廿年,都唔曉分辨mental層面嘅「醉」同「冇醉」:我哋往往認為肉身酒醉,「理應」繼而神志不清.然而,點解神志不清=吐真言?難到我哋偶而取悅他人,講啲與事實相違嘅美言之時,先係胡言亂語嘅酒醉狀態?
酒醉固然可以令人忘記不快,但我哋冇可能俾老細鏟完之後,一行出房嚟手就隊番罐啤酒--我哋可以做嘅,就只有忍氣呑聲,去pantry部水機前面以水代酒,繼而乸口乸面返埋位繼續開工.不過,假若我哋有幸去到「酒不醉人人自醉」嘅更高層次,將每日所有唔開心嘅嘢自行消化,咁「多飲水」少飲酒避免傷身,又可以發掘清水嘅耐喝性,咁年中又可以慳返唔少.
想飲酒嘅人,最需要可能係一個幾時都願意聽你訴苦嘅朋友，係嘛我嘅老死^-^...無論你過去、而家、將來同邊個相處,都係緣份難得嘅安排,少怨,多啲包容同珍惜...「維持良好關係」或者令你透不過氣,但領會過你「失去」果種悲痛,我希望你汲取以前嘅教訓,喺「失去」過後,能夠真正學懂「珍惜」.
當然,我哋作為口渴嘅人類,開心同唔開心,酒仍然係要飮.不過,就嚟貓就飲少枝啦.
|
