繼續係回應求死學生嘅留言。

......好強烈嘅負能量呢！

寫呢篇留言嘅時候，我正於親戚屋企留宿，原因係我叔叔因為肺積水入左醫院，留低左堂妹同堂弟係屋企，叔叔同嬸嬸一早離左婚，親戚們都忙於其他工作，所以請左我去幫手照顧佢地。堂妹同你一樣都讀中三，堂弟都讀小學五年級，要同佢地解釋爸爸發生咩事其實都唔困難，佢地都明白爸爸病情有幾嚴重。佢地表面都無乜野，但都可能因為無辦法扭轉壞情況而覺得無奈。尋晚臨訓時，同堂妹蓋好被，兩個女孩子就傾起偈黎，佢問：「點解永遠都只係見到你黎嘅？」

「我出名得閒嘛！」

「咁如果你忙呢？」

「我再忙都會抽時間黎煮飯同陪你同細佬訓呀！」

「咪就係得你一個囉，我覺得其他人自己忙，又覺得我屋企煩，就淨係識得推你黎，咁我覺得我地好似孤兒咁囉！」

「咁可能係佢地覺得我比較知道你地脾性，所以呢個最好人選過黎姐，某程度上都有為你地著想。」

「你唔覺得佢地咁樣假咩？」

「即使係假，都係一番好意，畢竟人本身都會有惻隱之心。最重要嘅係，有好多人連所謂『假意嘅關心』都無，你有，都算係咁。」

佢咀藐藐咁話：「唔使佢地扮好人囉！」

「我都未必係好人喎呀靚女！」

「至少你都識黎叫探吓我同細佬呀！」

「咁你姨媽姑媽抽唔到身去探你地都唔代表佢一定唔關心你地，感受唔到唔代表無，用其他方法支持你屋企都算係另一種關心，係咪？」

雖然我最後都唔知佢明唔明白我講乜，但身邊人對我地嘅關心，有真心假意，有淺有深，有近有遠，有感受到或感受唔到。無論係邊種都好，本質上，都係關心。有嘅時候，試著感恩，莫管它真真假假。