我鐘意做乜? 我想做乜? 我想成為乜野? 我既長處係乜? 我既潛能係?
回想過去既經歷,
喺中小學既時候, 我最羨慕有公職既同學, 比起其他同學多一份權利同責任, 責任係幫老師管理班級, 傳達訊息或處理日常事務, 例如收功課, 做壁報或管理紀律, 權利係可以自由出入校務處, 一般學生係受罰或警戒先會入既地方, 而由於同老師係合作關係, 所以佢地關係親密D, 有機會得到多D關愛同特殊照顧. 我成個基礎教育生涯最親密既老師係初三既班主任, 我可以去佢台攞佢既公仔嚟玩, 問佢借相機嚟用. 小學時既志願係成為老師, 因為個個都要聽老師話, 而且佢地識好多野, 有學生無既自由, 有獎罰既權利, 有更多資源, 例如糖同朱古力. 喺一年班一位新男老師入職既時候我地好開心, 向佢提問左好多問題.而第一位男英語老師教識左我地, Good morning或者afternoon之後唔一定係miss, 有時會係sir. 幼中班時第一次學講故事, 係三隻小豬. 小學羨慕人地訂閱紅蘋果同白羚羊雜誌, 係因為佢地家境較好, 定係因為隨書附送既玩具好新奇有興? 小學一年班有兩位同學爭住問我攞電話號碼所以我捐左落枱底. 三年班既英語老師曾經讚我英語能力係中上水平. 有偷野既經歷, 偷完會同阿妹交換用. 為左草錢買零食漫畫而行路返屋企, 或午餐食平D. 高三英文老師話由於班級水平低, 成年都無教到D乜有用既野. 由於新中文老師靚仔教學方法得意, 所以好俾心機做筆記同背書. 舊校舍每一個角落幾乎都去過, 對整個環境瞭如指掌. 高中時因為多次改革而度過混亂既時期. 對舞蹈班老師既朝令夕改不太滿意.
因為無乜得體既便服而放棄合唱團, 但喺團中只係中音部, 感覺無乜特別, 但一班人一齊唱歌同參賽係開心事. 細個 鐘意去公園同小朋友玩捉人遊戲. 高三時對化學有興趣, 而數學成績最好. 體育堂唔願意郁, 同同學坐埋一邊傾計. 早段時期非常抗拒出貓行為, 仍然認為咁做係無助學習, 對其他人唔公平. 對自己外表一直自卑, 但基本無做任何野去改善, 無資訊渠道, 無鼓勵同無意識. 初二加入左空手道, 自己先加入既, 後尾表弟同同學都一齊. 學過電子琴, 但由於時間無法配合而無完成. 漫畫班唔知點解無完成, 歌唱技巧班唔係我地原先諗既興趣班, 而係旨在培養參賽者. 手語班又係無疾而終. 結他班同流行舞覺得自己應付不來. 瑜珈個氣氛同時間都怪怪地. 葡國土風舞係參加得最耐既, 但有時要練習流行舞就唔鐘意. 對籃球有興趣, 但一年都玩唔到一兩次, 唔鐘意睇比賽.
大學時做過亞室運義工, 唔洗返學, 可以同同學玩, 食飯又唔洗俾錢. 法律, 英文同電腦安全最有趣, 其他根本唔知自己學左乜. 第一志願新聞及大眾傳播同翻譯都考唔上. 由於班主任話旅遊學院唔適合我就無考慮過, 但近年對導遊既職業有興趣. 而國內既保送同台灣因為阿媽話唔想我離佢太遠而放棄. 大一因為無朋友而無心機讀, 加上由中文學校轉去英文教學無法適應, 由於分組問題曾經喺阿sir面前喊. 對同學做問卷調查偽做數據既情況唔認可, 因為咁樣會影響統計結果. 因為做兼職有時配合唔到做小組功課, 但返公司影印資料非常方便. 曾經有一次挑戰帶領做小組功課但不算成功. 可以勝為核對資料既工作, 但感覺不能長期做. 對某D大學講師好失望, 因為無教育熱誠同技巧, 係對職業怠倦或對學生放棄? 但我地仍然對佢地喺評分評OK或好. 好驚脾氣唔好既英文講師, 討厭遲到行為同唔鐘意我地沉默以對, 會大聲講野同關門, 鎖門. 電腦專科讀唔入腦, 商科可能因為係英文又難明D.
一直都係差唔多考試先溫習, 無平時學完就溫既習慣, 所以英文生字學左好多次都係唔記得. 由人地特登教既野會印象深刻D. 邏輯學無法應付. 有時對數字唔敏感, 有時又會記得好清楚, 通常係自己既錢就會記得D. 有時會唔明人地既要求係乜, 或理解錯意思.
曾經最鐘意去圖書館或書局睇書, 因為書入面有好多我無經歷過既事, 無去過既地方, 無諗過既野. 對資料類既書有興趣, 雖然有時閱讀速度較慢, 但正確既關於年份, 價格, 背景及當時社況既資料令我感覺良好. 對書籍出版年份及物品產地有必須檢查既執着, 因為日期代表資料可能同現時既情況有不適用既可能性, 而產地則同品質, 價格, 環境, 經濟有關.
曾經有做過圖書館義工, 對圖書館管理員工作有興趣, 覺得自己可以應付.
對'今日既自己將昨天既自己打倒'呢個情況仍然在適應中. 討厭人地失多次提醒自己既過失. 對人地有時炫耀自己見識既行為有D苦惱, 會提醒自己盡量唔好做埋同一樣野. 可以理解服務員有時態度唔好, 會提醒自己將來做相似職位時會多加留意. 有時對食物的質量感到失望, 因為將食物做得唔好食係浪費, 尤其係殺生既食物, 而將一樣野做得唔難食既方法好基本, 無出錯既借口.
唔介意二手, 但唔鐘意殘舊, 爛, 污糟同起毛頭不能接受.
工作同參與活動方面
曾經做過酒廠換包裝員, 對其掛羊頭賣狗肉既行為不認同. 另在製衣廠當過包裝員, 當一個碼不夠時會用另一個碼頂替, 這樣太不誠實了. 在漫畫店的工作因員工太多而辭掉, 但為甚麼一開始要請我呢? 茶餐廳的工作挺累的, 但任飲任食, 而且識到唯一一個有眼光的人, 雖然有緣無份. 喺考到電單車牌後轉到日語中心工作, 由在學做到畢業一共5年. 從兼職接待員到後來的管理人員. 每次開始都要在新學生面前介紹分發既物品, 日常接聽電話同接待客人, 到後來要計算人工, 改善公司行政同課程用品, 處理政府相關部門既手續. 我比較鐘意接觸人既工作, 尤其係陌生人, 因為要記住名唔係易事. 參展時可以喺同平時唔同既地方做同平時唔同既野, 而且順便可以行埋展覧, 見到其他同行同接觸其他新資訊. 而澳日交流會既工作有機會見識到平時無機會接觸到既人事物. 我幾享受作為音樂會既工作人員, 身為主辦方而唔係觀眾有一種優越感, 因為同表演者既關係更親近, 同一班人落手落腳完成一件事既感覺幾有成功感. 但當熟悉既同事離開同習慣工作後開始感到無聊. 最討厭做補習老師, 學生不是成績有問題而係行為有問題, 完全搞唔掂, 返工好似落地獄咁慘. 測量公司既工作一開始唔多, 但同事離職後要做埋佢戈份就攰左少少, 但唔係成日做其實都還可以接受, 但少左同其他人面對面接觸既機會同工作無乜成就感. 人工唔低, 假期唔少, 工作量唔多, 其實已經係好多人想要既荀工, 但搵唔到生存意義, 每日淨係上網同返屋企, 得過且過得咁日子真係無乜意思.
參加過饑饉卅十同扶貧探訪活動, 當時真係感受好深. 世界上還有很多人過着朝不保夕, 今日唔知聽日事, 唔知自己有無將來既生活. 身在福中既我其實想追求乜野呢?
我希望我既工作可以幫到人, 有時會轉換工作環境同部分工作內容, 可以接觸到不同的人, 可以運用到我既語言同表達能力, 我鐘意讀書俾人地聽, 照顧鐘意既人, 引佢地笑, 每次聚會我都會主動留意其他人有咩要求, 時刻保持地方乾淨, 完結後會留低收拾. 我享受成為班上既風頭人物, 用幽默感、親和力、奉獻精神、能力或者瘋狂程度, 我希望獲得別人既應同, 我希望人地因為我既特別而記得我. 我分享我既喜悅, 將負面情緒抑壓, 因為每個人負責自己既已經夠辛苦, 無必要承擔埋其他人既.
有時對朋友好誠實, 唔想花心機去粉飾說話. 但對某D人會唔介意曲意奉承. 有時人地鐘意對我傾訴, 但其實我心不在焉, 無心機無興趣聽, 但都可以死撐. 有時扮專心同有興趣係好辛苦既事, 但禮貌上唔可以唔咁做.
我既憂慮係, 揀左一條路後發現辛苦值高過預期, 而放低安逸既生活去追求不穩定同未知既生活俾人好憨居既感覺. 出國一年俾機會我做左好多我以前無可能做又無諗過會做既事, 例如獨自去旅行, 同外國人交心做知己, 做互惠生, 住朋友屋企, 同3個陌生人共處一室, 被拒入境等等. 有好多時間去思考過去同將來, 諗法唔同左好多. 原先同同學比較自己係小人物, 對未來感到無希望, 完全無方向唔知自己想點. 之後諗通左, 其實我有能力有時間有資源去改變自己既情況, 我可以追上同學既水平成為一個專業人士, 只要我肯, 無野係無可能. 我需要既係信心, 動力同支持.
身為一個人馬座, 過往既人一直辜負左呢個星座既性格, 1號出世既我應該係天生既領導者, 我熱愛自由, 有創造力又有才能, 仲有人格魅力添, 我應該要好好善加利用呢種特質先係. 但我又怕孭鑊又怕壓力, 呢個係我下一步要改善既野.
最近睇既「發現我的天才」俾左少少方向我, 我需要整理一下戈34種特質再將自己戈D抽出嚟研究下.
整理至此, 係有D混亂, 但有D頭緒.
|
