|
今日係星期日，平時我會訓到起碼11-2點先超身，
但係由於今日約左屋企人去飲茶，所以就要早起。
點知係6點幾既時候，就肚痛痛醒左，
痾完一大輪，又訓返，訓訓下又起身痾，
係咁重覆哩個動作。(無奈=o=")
其實前果晚我已經感受到我個胃有少少唔正常，
但係冇理到，點知起身就肚痾啦。
但係由於今日去飲茶係因為預祝阿婆既生日，
所以都係死頂去左。
我家姐話有小巴直接可以到上水，
於是就去搵黎撘試下啦。
其實我們已經預早左出門口架啦，
不過架車係咁等客，所以最終都係遲左少少。
由於行果條路好多山路，加上我本身已經唔係太舒服，
落車既時候真係勁辛苦，又暈又想嘔。
去到茶樓好多野都唔食得，因為個胃唔舒服，
所以只係食左好少野，差不多全程都係坐。
飲完茶之後，由於好耐冇見過表姐，
所以入左去姨媽度坐左一陣，見到姨媽隻狗狗好心酸，
好慶幸佢係生於香港，我姨媽成家人都好鍚佢架。
大約3點幾離開左姨媽屋企，同埋表姐、家姐出左旺角，
出去既途中打俾熙少，叫佢出黎join我地。
係熙少未到之前，我同表姐、家姐一齊去左影貼紙相，
由於三舅父好耐都冇見過我地，所以叫表姐同我地一齊影返張相佢睇。
可惜我今日實在太殘啦，影出黎見到個眼肚同黑眼圈深得可怕，
連我自己見到都驚驚呀，唔知三舅父會唔會唔認得我呢。
大約5點半既時候，熙少就出到旺角join我地啦，
點知佢一見面就話今晚約左人7點幾係大角咀食飯，
當時個心真係有少少唔開心，不過算啦，佢都有佢既朋友既。
由於佢想買褲，所以就去左同佢一齊行聯合啦，
行左一陣，佢就已經買左2條褲lu，6點幾就話走先，
返屋企放低d野就去食飯，於是靜係得返我同我家姐行。
但係行行下我個肚又開始作怪，
於是我地行埋聯合就冇再行，目標為本地去左旺角買vcd，
行左2間，買左隻我左眼見到鬼就返左屋企。
由於今日個肚真係好唔舒服，一食野就會有想痾嘔既感覺，
於是我就好消極咁唔食野，等佢冇野可以痾同埋嘔。=_=
熙少係12點鐘度就返到屋企，不過有少少醉醉地，
所以佢一返黎就去左訓lu，咁我都一齊去，
但係因為個心有野諗，所以訓唔著，入左去15分鐘就出返房lu。
直至零晨4點先太累，走左去訓。
哩排成日都失眠，已經成幾日冇訓過一餐好覺，
個樣殘到難以形容。
今日當己熙少問我要唔要同佢一齊去食飯既時候，
我個心真係好酸。
如果係以前我都會考慮下會去架，
但係而家就諗都唔諗就會拒絕。
因為我太怕其他人既目光啦，
由我變到而家咁開始，唔好話佢既朋友，
連我自己既朋友我都唔太願意見。
我根本就係度逃避現實，連醫生都唔願意睇。
再係咁落去，我怕我自己終有一日會頂唔順，
無論係心理上定生理上。
p.s: 睇唔明以上對話既人請唔好問/.\我真係唔想講，請原諒我的任性。
| 
