慘絕人寰

繼續講返昨日件事，
其實係度同大家講聲對唔住先，
因為我真係太細膽，
所以其實果個網既詳細內容我係冇真正咁睇過，
因為我實在冇咁既勇氣去接受哩個現實。

但係今日，我終於同我家姐講起哩件事，
其實本來唔係太想講，因為我知佢知道左會好hurt。
但係我覺得佢應該有能力召集更多既人，
因為佢都識唔少愛狗人士，
而哩會集會一定要召集好多好多人黎參與，
咁先至有意思。

我今日只係用文字黎描述件事，
佢已經喊到收唔到聲。
因為只要係聽落都已經覺得係太可怕。
同佢傾完電話之後，佢喊成咁，
所以決定同佢落旺角行下散下心。
於是早退左2小時。

最後，我覺得我都需要知多少少，
就再一次鼓起勇氣，開左果個網黎睇，
但係我都依然係唔敢睇圖，只睇字。
可惜，連睇字我都忍唔住要喊。

我實在無法想像如果有一日，
我帶緊我既狗狗行街散步既時候，
有人走埋黎係我眼前將佢活生生打死。
如果哩件事發生係我身上既既話，
我到底點去面對？

果D中國愛狗人士一字一句既哭訴，
他們心如刀割的表情，
係腦海入面，冇辦法忘記。

我今日想叫我家姐將哩d 資訊post上一個佢朋友玩開既論壇，
叫佢朋友幫手宣揚一下哩件事。
於是我問「家姐，你大佬鍾唔鍾意狗ga？」
佢答「佢唔鍾意狗，不過佢係人。」
一言驚醒夢中人，哩個已經唔係關乎你鍾唔鍾意狗既問題，
只要你係人，你就會睇唔過眼，就會憤怒。
我相信只要係你地能力範圍內既，你就會幫手。

請大家多多幫忙吧。
謝謝。

刊登時間︰2006-11-26 12:31 AM  [ 編輯日誌 ] [ 分享至FACEBOOK ]