最後的團年飯

今日終於食最後、最重要既團年飯
就係入上水同我阿婆、姨媽食

訂左6點半食團年飯
我同熙少6點就到左
冇幾耐家姐同阿婆都到
等左一陣 姨媽佢地都黎左啦

食飯既時候冇咩影相
不過都好開心呀
我大表哥女朋友個女超級可愛
勁活潑 係咁問d好搞鬼既自創IQ題
笑到我地成台人反肚咁滯

食完飯之後 我家姐約左佢朋友一齊去行花市
咁我地唯有陪佢一齊等佢個朋友啦
等既時候好無聊咁係度玩相機

等左成個幾鍾 佢個朋友終於食完團年飯
出黎上水一齊join 我地出去旺角行花市
好耐未試過行一個咁熱既花市
熱都算 仲要係勁悶熱 行左幾步個身已經痴哂
不過既然入左花市 就已經絕無退路

哩幾張係入花市之前影 一路行緊去既途中

入左花市之後 真係勁多人
同埋由於個場地實在太細
加上個管理實在唔夠維園好
所以好難好難行 行到有點火

見到維他奶既攤位 以前飲住熱維他奶行花市可能係好爽 可惜今年.. .

我地行左一陣已經想死
好多臭汗味 所以逃出生天後已經唔想再行返入去
咩都買唔到 逼都逼唔到埋去

最後我地逼左出去 諗住落九龍城食糖水
由深水埗行落九龍城
其實話遠又唔係好遠 不過 .. ..
真係好濕呀 行到想發脾氣
好在d糖水真係超級好味 條氣順返哂

總括黎講 今日真係又愛又恨
熙少陪我行左咁耐都冇咩講
都幾開心架 加上又有美味糖水

刊登時間︰2007-02-19 01:35 AM  [ 編輯日誌 ] [ 分享至FACEBOOK ]