話說, 因為團購 HKD 699既關係 (按我)
我終於買左個光波爐啦~
個外箱呢....................因為工人姐姐太盡責, 轉頭就同我掉左~@@
睇番個煲先~
有個蓋同煲身~
蓋上面有個發熱管 同一個風扇既物體~
側邊有個安全掣, 要按實安全掣, 個蓋先會冚落黎, 唔怕夾親手~
下面有個升高掣, 只要按緊就可以將佢拉高, 加埋個配件, 7 升既容量就會變左 10升架啦, 係咪好神奇呢？
真係慳電慳力~ 
至於D掣, 其實都幾簡單~
不過, 最搞笑係 我將人地一小時, 當係1分鐘,
個煲新買返黎要HEAT 一陣, 我按左個一個鐘頭45分鐘咁耐架~@@
好彩後尾發覺得快~ HAHA
有關方便真係要寫清楚啦, 費事好似我呢D大矇既阿媽搞出大頭佛啦~
幫個爐熱左身, 就到我既熱身之作
燒春雞~
首先, 要幫隻雞洗白白~
之後就用姜，生抽, (老抽少少調色), 本黎要落少少酒, 但工人姐姐唔食得, 所以skip左~
醃佢一個半鐘 
跟住係煲底放個細腳架仔, 成隻雞放落去
溫度 : 270度
時間：25分鐘
一按開始, 成個爐真係變左光波咁 發哂光~
細心d睇, 會見到佢入面有d氣流係度轉架~
呢個爐係全透明的, 對於我呢d唔太識煮野食既人就好啱
可以睇到佢熟未, 唔怕煮到焦左~
因為隻雞放得唔好, 焗左十幾分鐘, 一邊就開始黎料
另一邊就未太熟
所以熄左佢, 反一反雞, 再燒多十分鐘~
登登登..................................
我既第一次製成品出場啦
光波與春雞~
雖然d色唔係太勻, 不過成隻雞都熟啦
而且真係皮脆肉嫩~
d油落哂底, 食得好健康~
最開心係整完只係洗個玻璃煲就可以, 唔使好似焗爐咁抺幾十樣野~
而且煮食鍋獨有內置清洗功能，加水,再以光波高速旋轉原理分解容器內頑固污跡，自此清洗爐具變得毫無難度。
今次算係半成功啦, 希望下次再挑戰成功, 同大家分享下~
如要聯絡本人，請電郵至：[email protected]
|
