等左咁耐,終於等到Pop Rock啦!!

同2K食完早餐(M記,佢咁岩有買飛去睇,不過唔同區)

約左阿珊佢地10點係元廣搭車,以雀躍既心情上車,開左車後,

順口問下佢地有無帶飛,(諗住邊有可能唔記得呀!)

點知,世界上總係有好多意想唔到,

兩個傻瓜都無帶飛,佢地就飛落車返轉頭攞,

唯有我同2K去先,幾經轉折,我地終於去到添馬。

個條人龍真係嚇死人,圍左添馬個幾2個圈,(Tweety已經俾左心理準備我地)

行左大半個圈,好彩都搵到龍尾,

個度有人係度派Red Bull(做宣傳),

味道怪怪地~(丹丹話唔知邊隻飲品,有尿既成份,我同阿珊對望左一陣...)

2K都唔知做咩鬼,2次飛爛我把扇,

仲不停搞Gag,(相信佢係唔想架囉~)笑到我地死咁滯!!

差唔多一個鐘倒,我地就入到會場,

係入口要Check袋,佢地將所有人既食物充公,

我包買左成$11既麵包都出師未捷身先死,

邊個食左我包麵包我就咀咒佢俾麵包哽到!

搵位擺低d野,離個台都唔算太遠,至少睇到台上既人樣,(大概)

會場入面d野,真係好過搶,

$6一杯細過細杯自由斟既可口可樂,

$10一個細過合味道既杯麵,$10八粒燒賣、魚蛋,

3點開始上半場,都係一d不見經傳既Band,好嘈~

5點幾個陣,突然落左場大風雨,

個陣我同阿珊排緊隊買野,雨大到我地想走又走唔到,

唔走又俾d雨淋濕晒,之前勁熱,而家勁涼浸浸囉~

場雨落左好耐,下半場係阿葛做主持,佢勁搞笑,

話我地上晏乾煎完,下晏就濕炒,全場笑晒,

下半場開場有戴夢夢,佢一出場就唱一首幾Rock既歌,

仲著得好Sexy,同佢之前個Style好唔同,不過唔錯,

之後有台灣既旺福,佢地將個氣氛搞到好High,

入夜之後,有達哥+Kellyjacky、鄭容、泳兒、王菀之等,

最無奈係唐朝出場個陣,大家都唔知佢地唱咩,

主音個個男人(40歲up)狂嗌,爆咪,不停有奇怪走音,勁嘈,

簡直係虐待我地既耳仔,最慘係佢地唱左成個鐘,

下面一片死寂,上面自己係度high,;

最冧係張敬軒,軒仔個Part,一出黎就唱<酷愛>,

係咁出型仔樣,場內所有女性尖叫,再黎就係<笑忘書>,

之後仲對住我地好深情咁唱<Hurt So Bad>,

全場大合唱"Baby I Love U So Much",(當時落緊雨)

軒仔好感動,一邊唱,一邊對三面既觀眾鞠躬,全場多次歡呼~

期間有夜煙花環節,台頂、兩邊既大廈同對岸既大廈都裝左煙花,

漆黑之下,係我地頭上360度咁爆,再次全場尖叫!

千呼萬喚始出來,等左成10個鐘,終於等到w-inds.

全場用盡氣力尖叫,(本人都係)

佢地唱左3首歌,全部都有跳舞,

其中一首係<四季>又係全場一齊唱,(我識唱dd)

慶太、涼平、龍一都有好多靚仔樣,

以慶太最多,全場不下數十次尖叫,(因此得到尖叫後遺症)

真係勁愛w-inds.!!!!!!!!!!!!!!!!!!!!!!!

佢地唱完之後,全場狂嗌"Encore",可惜無得Encore~

最後係草猛,佢地竟然上升降台(車個d)開水喉,

我地已經乾煎+濕炒+炆焗完+再濕炒中,

而家仲要水上加水=>煲埋湯,今次真係"難忘"!!

拖住已經無知覺既軀殼+無聲既喉嚨,返屋企~

雖然好攰,但係見到Keita同Ryohei既可愛樣,咩都抵返晒!!!

後記:

我地飛的去巴士站個陣,同w-inds.既車係一個Moment相遇,

係個個moment,我地只有一臂之距....