不知不覺，已經有足足兩個月冇打過blog啦~ 呢度可以用「被荒廢」的詞語黎形容...

而家先知，原來係band1頭名校讀書係咁辛苦嘅，尤其係入左精英班，每日都有大量知識灌輸，返黎就成日係度整理返，做下pratice，溫返啲筆記，晚晚都搞到好夜訓...雖然開頭嗰個月真係幾辛苦吓，不過而家已經完全適應左啦~而且孜讀得好開心。唔知大家又習慣左中學嘅「生活模式」未呢?

開頭我都驚會識唔到朋友，因為得我一個人去讀，但係而家已經識左大半班啦~其他班嘅都識，大家交流吓，小息一齊玩，lunch就一齊食飯，真係好開心啊~~佢哋都好勁架，好多鋼琴八級，又有大提琴八級，長笛八級...我真係好渺小啊...有小小自卑...有啲屋企係講英文，出去狂補習，有啲係書香世家出身，有啲屋企就屬小康類別...有好多人都係阿爸阿媽揸靚車送返學放學，我咪係度欣賞囉~對於家世呢樣野，我雖然唔及人，但係我絕對唔會自卑﹐因為我知只要我讀好我嘅書，我將來仲會出色過佢哋好多倍，我係抱住呢個信念黎返呢間學校嘅，我都預左會有好多無論成績、音樂、體育或者家庭條件比我優越好多嘅人，但係咁唔代表我一定會差過佢哋，雖然我可能係某啲方面超越唔到人哋，但係我知我點都會出盡全力，向同一個目標前進架!

講左咁多野，講返我間學校啦~我哋一上中英數就要走去其他課室上堂，模式同大學有小小相似。咁點分精英班呢?基本上，班別係冇分排列嘅次序嘅，不過我哋會分組黎上中英數，組別排列如下﹕

Division:  A (精英班) > B > C > D (輔導班)

咁如果有一個數學天才，佢數學非常非常勁，但係英文非常非常差，而中文就屬中上，咁佢嘅分組情形就會係:

中文﹕Division B

英文:   Division D

數學:   Division A

明白啦?~

所以堂堂我都要執拾細軟，走去1A嘅課室上堂，如果不幸漏左野係自己嗰班，咁就算你有做，都... 所以，每次撤離都要執好行李先...

唉，打得好累啊~遲啲再打啦~( 遲啲~可能要遲一段時間喇...)