今日，我終於完成左嗰兩個面試喇!!

~尋晚，我緊張到訓唔着啊，係咁係張牀度「碌」嚟「碌」去，我都想早啲訓架，不過都係訓唔着，到左大概凌晨一點先訓得到，唔知個老師有冇留意到我對眼變左L對Smoke Eyes呢﹖六點九，我就起左身啦，點知食食吓早餐嘅時候突然勁肚痛，搭車嗰陣又好唔舒服，真係「黑仔」，好彩，呢啲事都冇影響到我嘅表現......

~首先，我喺八點幾去到高主教，由於時間仲係好早嘅關係，我就係間學校四圍兜吓，原來「高」主教書院真係好「高」架，我數過大概有十三層樓咁高啦，去到操場嗰陣風涼水冷，好大風啊~~~如果我不幸入左呢間學校嘅話，就一定要加多件外套喇......唔知點解，我突然好期待高主教套女裝校服，會唔會好似男仔嗰套咁，係綠色嘅呢﹖算，只要我入到聖士提反，就唔使理佢套校服點啦。等左一陣，個老師就叫左我入去一間房度等喇，佢俾左一篇英文文章我睇，然後叫我讀出黎，篇野勁淺囉，我好快就讀完，佢仲讚我讀得好啊(^^)，之後，佢用英文問左我幾條問題，例如嗜好啊、最鍾意嘅英文書啊咁，我都答得幾流暢吓，個老師仲好好笑容咁望住我喎，開心啊...之後，另外一個老師就用中文黎問我問題，佢問吓我最有成就感嘅一次經歷同埋我嘅志向，我都講得好完整，佢話同我講野好開心喎，睇黎高主教嘅面試係……成功嘅！！！

∼跟住，我就行路落去聖士提反啦。我去到佢哋嘅禮堂度等，喺度睇佢哋間學校嘅影片，佢哋間學校嘅運動細胞好好架（自卑中…），特別係排球隊啊，啲學生超勁啊！過左一陣，我就入左去面試喇！佢係用小組嘅形式面試嘅，我同其他兩個同學就一齊面試，個考官首先俾左一個類似劇本嘅野俾我，然後叫我哋輪流做角色扮演，我嘅英文講得都幾好啊！跟住，佢就俾左一幅Ｓｎｏｏｐｙ嘅漫畫我哋睇，之後‘又問我哋一啲關於漫畫內容嘅野，之後，佢就俾左三個題目我哋選擇，叫我哋利用一分鐘講吓同個題目有關嘅野，我就簡左Unforgettable experience（即難忘的經歷）呢個題目，我就開始作故仔啦，作完之後個考官仲話very good添！最後，佢就叫我哋就香港舉行奧運馬術項目呢個題目黎作一個小組討論，我都表現得唔錯掛．．．做完個小組討論之後，個面試就完啦！

∼做完所有面試之後，我就非常ｈａｐｐｙ咁同爹啲媽咪去食Pizza Hut，我食得好飽啊∼畢竟個面試都完曬啦，哽係要好好效鬆吓啦！我哋傾左好多野，佢哋都好開心。佢哋仲好關心咁問某人收到華仁封信未添，大好日子，提起呢個人真係唔應該，佢哋仲好激烈咁討論點解某人仲未收到信嘅問題，佢哋話可能華仁遲啲先面試，因為有啲學校都係四月份先面試，而且某人成績咁「好」，一定入到華仁嘅，佢哋真係睇得起某人啫。本來我哋打算同表姐一齊去Ｓｈｏｐｐｐｉｎｇ嘅，不過我話我好累，所以自己先搭車返黎，其實我相信大家都估到，精力不知幾充沛嘅我點會累吖，我只係想打ｂｌｏｇ啫，哈哈．．．．．．

∼聽日，我就會同爹啲媽咪去睇電影，本來我想睇我最鍾意嘅Ｌ架，不過佢哋話要睇公元前１００００年喎，咁我只好跟佢哋去啦，唉．．．我真係好想睇Ｌ啊．．．．．．算啦，陪吓佢哋睇都冇所謂嘅，反正Ｍａｒｔｉｎ哥哥遲啲就會買呢隻碟嘅，我始終都會睇到嘅。

嘩，今日打左好多野啊，我就係度停啦！我而家要睇衛斯理喇，８８！

Ｐ．Ｓ如果某莊黎過呢度嘅，我想問你一條問題﹕我始終唔明白曹振鋒嗰日畫隻兔仔點解會係嗰樣野黎喎．．．．．．