真係估唔到上一篇的 <越式米紙卷> 吸引左好多姊妹既支持同喜愛, 令我開心左好多日呀!

首先要好好多謝支持我既姊妹們先~ :P

依次, 又等我搞下新意思, 要唔止氹另一半開心, 仲要令家人/ 朋友 / 同事都好開心既小食~

登登登登~~~  就係 <林明頓蛋糕仔> 啦~

我同亨利去親 Pacific Coffee 或者 McCafe 都好鍾意食 Lamington Cake 架~

就係因為咁, 靈機一觸, 不如自己試下用最簡單 (即係最懶) 既方法整下先~

做法超級簡單, 材料只須: 朱古力醬一支, 現成蛋糕, 同埋椰絲就 ok 啦...      

其實你可以自己焗海棉蛋糕加埋自己煮溶既朱古力, 效果都係一樣, 只係功夫多少少囉, hehee…

跟住就將蛋糕切粒... 當然你可以自己焗埋海綿蛋糕啦... 不過我就係一個 "焗爐白痴", 所以都係買現成既蛋糕啦~

只要係快手將蛋糕仔搽滿朱古力醬, 跟住就滾滿椰絲就搞掂啦!!!  最好跟住雪番十五分鐘左右, 就會仲好食呢!

成功又好味又容易之作 --- 林明頓蛋糕! 做下午茶真係一個好選擇喔!

朱古力 – 食左會令人開心~ 少食又唔會肥~

希望你地鍾意我今次既好主意啦!