串得起同串得啱，呢樣野我最唔明。
拿，咁講。串人呢，我覺得冇分啱同唔啱既。
串人既問題，響個動機度，唔係個內容。
有D人講既係事實，係咪就代表「串得啱」，所以連道歉都唔應該呢？
我舉個例丫。假設你有一日，去到一間比較貴既舖頭度買衫，買衫既途中，俾你撞到個朋友同你一樣，想響果間舖度買衫。呢個朋友家境冇你咁好，搵錢又唔多，於是你就串左佢係「窮鬼」喇。
你冇講錯喎，佢係真係少錢過你丫嘛，佢真係窮喎。你講既都係事實，按照部份人士既講法，即係你「串得啱」啦！
大佬，串人係錯在動機同心態，唔係內容呀。
有D外脆內冧ge炸兩話"要串人，最緊要串得起。而串，係自信心既具體表現。"
我又有d唔同意wo。
串得起，同有冇需要串人，我覺得係兩回事。
串得起代表你夠叻，因為我服你既成就同能力，即使我俾你串，我都心甘命抵。
不過你係咪真係有需要串我呢，我又有d保留。
呢個社會好多人都好串，不過串係咪就等於自信心呢？
我反而覺得，有d人，就正正因為自信心不足，所以先要不停咁去裝出一副串樣出黎，等人唔好睇小自己。
我見過不少好有料，自信心亦好強既朋友，佢地不單止唔串，仲係一個謙謙君子添。
講串得起，佢地絕對當之無愧，不過，我對佢地既謙厚、勝而不驕既態度，就更加欣賞囉。
by the way，我諗，我今日痴鬼左。居然嘔左咁鬼大堆廢話出黎。
悶親大家啦。