今日去咗將軍澳一間中學到in代課老既囉
又係將軍澳囉，真係有緣呀
間房裏面有校長同科主任
首先就係試教，教三角比
則係sin,cos,tan，中二既課題
表現緊係冇敵啦，而且我真實教過
不過重點係佢地兩個之後d問題囉
佢地根本係到問d冇答案既問題
等我將個問答環節重播一次：
科主任問：如果有同學問你點解要學三角比，你會點樣答佢呀?
我答：我就會同佢講番上一個課學既課題畢氏定理，畢氏定理係講當有一個直角三個形，如果知道咗其中兩條邊既長度時，就可以計算出第三條邊既長度，但係三角比依個就有分別，就係係直角三角形，知道咗其中一條邊既長度同埋其中一隻角之後，三個角既所有資料都可以計算得到
科主任問：咁如果佢話學畢氏定理都冇用呢
(我心諗，咁你咪則係問緊學習數學既意義)
我答：我會答佢其實學習數學,除咗了解數學上面既課題內容之外，我地仲要學識建立邏輯思維同埋解難能力，則係好似係三角比個課題咁，你要知道題目俾咗d咩資料你，題目又要問你d咩資料咁，再根據你自己個個人分析，黎睇吓究竟係用sin,cos定係tan黎幫你手搵出所需要既答案
科主任問：學生好多時都唔記得咗公式，則係唔記得咗咩邊除咩邊，咁你會點幫佢地呀?
我答：咁學生係初初接觸依個課題既時候，唔記得係好正常既，但係同學做多咗，認知耐咗之後就會自自然記得架啦，咁當然要視乎學生能力而定啦，可能要係初頭做一d默書既工作，保證學生記得係直角三角形裏面邊條邊打邊條邊，記得sin,cos,tan係咩邊除以咩邊，因為如果學生連依d基本既定義都搞唔掂，之後成課書都好難學得好
科主任問：如果學生問你點解要指定咩邊除咩邊，唔可以調轉既？
我答：依個係因為我地既祖先既數學家發現咗d邊相除之後個比例係有一定既結果同規律，所以佢地就定落咗係咩邊除咩邊方便我地日後計算啦。
科主任問：咁如果d同學話，我使乜識學計算姐，我用把間尺度咪得囉
我答：咁我就會引用佢地之前係學年頭學過既一課課題，量度與誤差,我會講例如你用間尺量到出黎係10.5cm，係咪代表個真實值係10.5cm呀？你之前學過誤差果課書，都知道我地每次量度都會出現誤差架，咁就變得唔準確，但係如果我地學咗三角比依課書之後，運用適當既公式，就可以搵到真確值啦
之後就到校長發問啦
校長問：今次代課老師要教中四既班別，如果你面對d同學係冇咩動力學習數學既時候，你會點做呀？
我答：首先我會嘗試係我個課堂上面設計，講課既時間盡量小，俾多d時間學生做練習，而練習既題目就較為淺開始，令到佢地容易做到有d信心，而當中我又會留意吓佢地做練習果陣有d咩問題，從而可以個別教導佢地
校長問：咁如果你俾咗d淺d既題目佢地都唔想做呢？
我答：咁我就嘗試同佢地傾吓，睇吓佢地個問題係邊，又會同佢地談及人生目標，要令佢地知道有目標就一定要努力，而係讀書方面就最少有基本既成績
校長回應：好多時學生都未知自己有d咩目標
我回應：咁就同佢地傾吓睇吓佢地有d咩興趣啦，如果可以同學生建立咗良好既關係，學生就會尊重老師，係課堂上面亦可以比以往用心
校長回應：而家個代課職位得三個月時間，你邊到有咁多時間做，再加上一班可能有十個同學都唔讀書，咁你邊到可以逐個同佢地傾呀，同埋到學期尾考試又有一次打擊個囉喎
我回應：咁新高中既中學文憑試係中六先至考，咁如果佢地肯而家開始努力學習的話，都唔會遲，都會係公開試攞到好成績
面試結束
之後我諗番，根本佢問d問題就係冇答案，不如我調轉問番佢可以點令到d同學努力讀書啦
如果d學生自己都冇心向學，自己放棄自己的話，其他人點幫都幫唔到佢架啦
如果唔係整個香港都唔會充滿住d唔讀書既人喎
而且一個人既力量有限，點可以同時幫到全香港既人呢？
講真，如果d學生真係唔想讀呀，你用支槍指住佢個頭都唔會讀架啦
佢咁樣話我個個方法都話行唔通，究竟想我點答佢
我已經俾咗好多方法架啦，佢係咪想我答佢，其實冇方法架，要學生個人自已本身識諗先得架
你地睇完之後有d咩意見，有d咩好提議，有d咩好方法呢？
留cm俾我話我知呀
| 
