Day 1

二月二十六號，星期日，八點起身準備去機場，但真係好黑仔，又搞肚痛，好在唔係太犀利，痾完就冇事喇！搭巴士去到機場啱啱好十點半，落咗車之後諗緊行去邊面搵湯米時，佢已經喺我後面標咗出嚟喇！

搵完EGL 個人攞咗機票就Check-in 喇，好嘢，又可以坐窗口位！但係好奇怪點解泰航啲櫃位係用Cathy 啲Ground Staff 嘅？！食完老麥嘅早餐(係我最愛嘅熱香餅同薯餅呀！^___^ ) 喺機場行咗一陣，攞完錢同埋買咗啲嘢就過海關準備去入閘口喇！但係去到閘口竟然未見到架飛機喎，等等吓遲咗三個字先上得機，第一次坐泰航，感覺上架機好舊咁，又冇獨立電視，咦！！！啲飛機餐又唔好食，都幾失望吓！

落咗機踏出機倉一刻，真係一踏出機門嘅嗰一刹那，就已經覺得好熱，有成三十四度，溶喇！！！過咗海關，攞行李，唱埋錢，就搭的士去酒店喇，搭的士嘅過程比我想像中順利，用咗半個鐘度就到酒店，連埋Highway 費，都唔使三百Baht，比我預計中平咗同快咗！返上酒店放低啲嘢，哈哈，就準備出去喇，出去都差唔多食晚飯喇，去咗Siam Centre 一間叫Sizzler 嘅Steak House 食嘢，好抵架，我食咗個炸魚加雞加薯條，湯米就食咗個豬加雞加薯條，好大份架！計番都只係港幣六十蚊度！而且仲係免費任食沙律添架，仲有甜品，但係叫咗杯Iced Mocha 啲味就好淡，同埋唔似Starbucks 嗰啲咁有cream 架喎！食完飯行咗陣，去埋National Stadium 行MBK，見好多鋪頭都收工喇，咁唯有返酒店lu！

今日雖然係冇乜行程，但勝在夜晚食咗餐好滿足嘅晚餐，好開心呀！同埋第二次去曼谷，有一種好熟悉嘅感覺，好多地方都冇乜點變，好在都仲認得路！

Day 2

酒店嘅早餐比我想像中多嘢食喎，食完早餐就去行Siam Centre、Siam Discovery Centre 同埋新開嘅Siam Paragon，啲商場係大就係好大，但係冇乜人行，同埋有時地方太大會減低我想行街嘅意慾，因為實在太攰喇，行到攰就去咗UCC 飲嘢，叫咗杯好甜嘅朱古力飲，好甜，太甜喇！！！跟住去咗Chit Lom，去咗林真香買手信，跟住好攰喇！啲嘢又重，所以我話返酒店放低啲嘢，跟住瞓咗一陣先再出去食飯行Zen Department Store、Gaysorn Plaza 等等！呢晚去咗食泰國嘢，間嘢好少人，搞到食飯好冇氣氛咁，死沉沉！啲嘢食一般啦，間嘢仲要話係謝霆鋒同張柏芝去食過，但真係冇咩特別囉！！！之後又再去MBK 行過，再夜啲就去咗Sala Daeng 睇Show，雖然唔係第一次睇，但係都有少少緊張，哈哈！睇完Show 返到酒店都差唔多十二點喇，沖完涼就瞓喇！

今日好開心呀，買咗對Converse 同埋一件Tee 呀，泰國都有Converse 專門店架喎，好多Converse 呀，好多款呀！仲有泰國啲Converse 個鞋頭係圓啲架，我覺得好睇過香港嗰啲！

Day 3

呢日想去做Spa，本來跟住本旅遊書去搵一間Spa，但係行咗兩次都搵唔到，又曬又熱，又出晒汗，搞到我同湯米都忟忟哋，大家都面黑黑咁，好驚！！！之後搵唔到索性唔搵喇，之後搭Sky Train 去咗Phrom Phong 行Emporium Shopping Complex，去咗Boots 買嘢，我認得個Sales 呀，前年去嗰陣佢都喺度做架！之後湯米話胃痛，坐咗一陣，再睇吓邊度有Spa 做，最後去咗Asok 一間叫The King and I Spa 做Spa，咁大個仔第一次做Spa 咋！去到揀Plan，之後上一層樓揀香薰油，之後上五樓入房沖涼，做Body Scrub，再去浸按摩池，之後再做香薰按摩，做咗兩個鐘，做完雖然冇一種疲勞盡消嘅感覺，但真係幾舒服嘅！做完Spa 搭Sky Train 去湄南河坐船，去咗皇宮附近行咗一陣就走喇！返番去Siam Paragon 食日本嘢，去咗一間叫Fuji 嘅食店，好多人呀，但係啲嘢食又真係幾平同幾好食！之後返酒店沖涼，哈哈，再搭地鐵去Suan Lum Night Bazaar，第一次喺曼谷搭地鐵，好乾淨呀，又方便，一上地面就係 Suan Lum Night Bazaar 嘅入口，行咗一陣，覺得呢個巿集乾淨咗，之後去咗 Surawong 一陣就走喇！

呢日真係好攰，同埋有一種好悶熱嘅感覺！

Day 4

食完早餐，湯米出去買嘢，我就返咗房，瞓到一點差唔多Check-out 喇，之後再去Siam Centre 行，再買咗件Tee 同Converse，跟住就返酒店拎行李搭的士出機場返香港喇，又坐到窗口位，哈哈！有個空中少爺好似王力宏架，哈！返到香港七點幾，嘩！原來香港得十一度，好凍呀！返到屋企已經差唔多九點喇！咁就去完四日三夜嘅曼谷旅行喇！