早幾晚係婆婆屋企坐正打左四圈台灣麻雀，好難得咁樣贏左五百幾十蚊。第一次覺得咁邪門，邪門既原因並唔係因為有啲咩污糟野。原來一個人有運氣起黎真係可以要邊隻摸邊隻，果頭叫糊呢頭就有得食，做莊果時仲要連續拉左幾鋪，果粒骰擺到去「五點」果時我真係有啲怯，細舅父比我拉左一百四十七蚊果時好頹咁樣話「小章頭身一鋪清我袋...你係咪搞緊大生日呀？」。雖然贏錢的確有啲沾沾自喜，但至少我到呢刻仲謹記「輸錢皆因贏錢起」既道理。
返到屋企準備訓教既時候爸爸突然話「好靚啊」，跟住我地一家三口就逼左係個窗到，一層層雲朵加上藍黃燈紅等既顏色匯聚而成既天氣真係叫人讚嘆。我輕輕俯瞰窗邊，望住眼前果幅油畫逐點逐點變化，直至最後係山與山之間出現一個火球，徐徐升起。成個畫面就好似將我拉番起七月尾既宿營咁樣，我地八個同樣係東灣海灘不停影相留念......雖然我地三個住緊只不過係幢面積恰好夠住既公屋，但勝在對住個能夠欣賞「黎明時分」既海景，萬分滿足同感恩！
「原來時間真係過得好快」，記得一年前呢個時候我地仲抱怨緊點解LEADERSHIP TRAINING CAMP會因為颱風而轉換左另一種訓練模式，記得一年前會諗下果晚可以同成班朋友玩啲咩-V- 原來呢一年對我黎講好實在同樣好抽象，實在既係好多經歷同令到自己有所成長；但係抽象既係每個片段都好似發夢咁樣眨下眼就成為過去。或者下次當自己再講「原來時間真係過得好快」既時候，我已經考完DSE、已經準備畢業、已經準備迎接新既生活。
早幾日澄澄同埋汛汛黎左我屋企玩左個下咒，媽咪隆重其事咁樣佢床下底果兩個大膠箱搬出黎，原來我真係將太多太多細個玩過既玩具保存起黎，LEGO同煮飯仔套裝都不在話下，仲有個玩具冰箱同埋大量車仔。我都唔敢數自己究竟有幾多架呢啲車仔，特別係巴士，細個真係超級無敵鍾意推住架巴士係屋企走黎走去，最有趣既係我從來唔會漫無目的前前後後咁樣推，而係會好天真可愛咁樣SET條路線比啲巴士行...當然會有停車上客既機會，直至果日我見到呢箱車仔，雖然兩個表妹表弟都玩緊，但我都情不自禁咁樣打量每架巴士，再一次係地上面推黎推去，重拾童真！我有個好狂妄既夢想，我希望自己有個空間可以展示一個LEGO小城市，反正宜家屋企都有足球場、機場、警署...但當我每次上網見到果一盒盒好靚既建築物就會好想帶埋返屋企。不過要買咁多盒LEGO除左錢之外，空間更要考慮......
最近溫習溫到悶既時候都會睇番細個寫既日記打發時間，原來直至初中我都只係著重一件事既過程，比如果日我做左咩同食左咩，從來都好少著筆自己既感受。但隨著自己慢慢大個，同一類型既事都可能有唔同既體會。印象中我中一參加陸運會真係好想跑快啲攞番塊靚牌，字裏間都會好仔細咁講身邊七位選手係邊個，而自己有幾難晉級；但最近呢年既陸運當黃社得到全場總亞軍既時候的確比起個人榮辱更加重要。雖然宜家未必每篇打好既「東西」都不折不扣咁公開，有時我會情願穩妥咁存放係電腦硬碟裏面，或者呢啲就係一直以黎所講既「私人空間」？
想知時間流逝有多快？睇暑假就知。
想知暑假流逝有多快？睇你枱頭上的功課就知。
距離中六開學日子只有七日，上年考完FINAL EXAM既時候堅決咁同自己講：「暑假要開始溫書」！無奈最後只能夠PREVIEW同REVIEW補課學過既野，或者我時間管理真係出現些少問題...但總算無虛度呢兩個月先啦。今日既ECON TEST，儘管自我感覺幾良好但唔敢多作評論喇，希望之前花既時間同努力係PAY OFF架啦！
|
