如果有人兜巴kum低我，一路踩住我個頭一路鬧我知我人格邊部分有問題乞人打，我會開心得多。

xxxxx

如果讀書讀得好代表到一個人o既價值，
我會想心安理得咁繼續死讀書落去。
但當社會逐漸傾向相反o既論調去，
而我又明白體會到呢種論調的確係啱時，
無疑會否定自己迄今o既人生。
可能個仔讀書稍有成績，
可以帶比自己好大o既虛榮感，
但有冇諗過我o既立場呢？
有冇諗過咁讀書競爭落去o既勾心鬥角，
有冇諗過會令我成為讀書外就一無所有o既廢柴？
不懂事時奉父母之命是從，卻害左自己。
真正有能力o既人，唔使逼都可以面面兼顧得好，
硬係唔明我o既平庸，要我擺哂所有能力落讀書度，
結果咩都做唔好，課外一啲都唔活躍，運動白痴。
懂事後想補救，但深感有啲事係要細個開始就做架囉…
雖然知道做子女o既冇權選擇父母，
雖然竭力阻止自己憎恨父母o既念頭，
但喺自己已有能力思考o既同時，
禁不住會質疑父母曾經對自己所做o既每一個決定。
點解冇諗過不斷催逼讀書會帶黎壓力？
點解冇諗過除左讀書外o既所有嘢？
點解從來冇過問過個仔o既交友狀況？
點解從來唔認識任何個仔o既朋友？
點解冇叫過個仔帶朋友返屋企玩？
點解從來冇同過我傾任何心事煩惱？
點解冇了解過善全啲o既教育方式就生左我出黎？
但質疑o既同時又會自相矛盾，
明白自己同父母o既人生經歷完全唔同，
父母硬要彌補自己成長時o既遺憾比我，
殊不知又製造出新o既唔同o既不足。
學做人學左廿年，愈學愈倒退。
兩代之間鴻溝如淵，
自已亦深知除成長經歷外本身性格都缺憾多多。
想做個討喜啲o既自己，最後都硬係力不從心，
以為可以坦率大笑，卻摸到臉上o既面具。
唔瞭解自己，唔瞭解別人，唔識開心咁做人，
滿腹牢騷呀。

xxxxx

如果生於戰亂、動盪o既時代，
終日為糧食、安穩呢啲基本需要憂慮，
會唔會比安逸但空虛o既人生好呢。