成個幾星期冇寫日記喇，一來上星期有幾晚都夜左返屋企，而前幾日自己又病左，所以早左訓，要到今日先寫番日記，咁就講下呢個幾星期發生左 d 咩事先！

上星期話公司有部電腦壞左，做唔到 bulkscan，之後整番好就有番野做喇，但係好多咭都要 scan 過，俾 Katherine 話我點解儲埋咁多咭，無奈，佢點會明丫．．．宜家都唔敢堆太多咭係自己個位度，費事又俾佢話，點知佢今日唔見左叠咭又黎問我，真係冇佢咁好氣！

上星期三上 Training，本來幫同事霸左位，但係因為 d 同事仲做緊野未放工，所以 Training 開始時，個 Trainer 就叫其他坐側邊 d 同事坐埋去本來我霸左既位度，當時勁尷尬呀，好似我係度阻住個地球轉咁，好瘀！之後落銅鑼灣，竟然撞到問米婆仲同佢同車喎，哈哈，跟住過左旺角等 Tommy 放學，又俾多左個驚喜佢！

星期四放工去做 GYM，一路做一路等 Sunny，點知差唔多六點 Sunny 都未到，幾驚約錯地方呀，因為佢冇帶電話，所以又搵唔到佢，最後佢黎到話好攰唔想做 GYM，我見佢個樣真係好攰呀，咁跟住我地就走喇，行左陣跟住食飯！哈哈！你唔好再俾說話我聽喇！知冇？！

星期五約左 IVE Year 1 班舊同學去千秋樂食日本野，其實我唔係咁鐘意食日本野，食生野我又易肚痾，食牛又毒，炸野又熱氣，但係咁難得大家先可以出黎，都冇所謂啦，但係千秋樂個洗手間好污糟，唔掂呀！跟住我地去左 Home Design Café 飲野，仲玩埋波子棋添，好玩呀！

星期六返到公司就不斷流鼻水，初初以為係鼻敏感，點知下午仲係不停咁流鼻水，好辛苦先挨到放工，跟住去睇醫生，因為之前訂左飛，所以都去左睇戲，但係全程我都係呆呆滯滯咁，原本 Tommy Book 左枱食齋，但係最後都冇去，去左食粥，跟住就返屋企喇，成晚都訓得唔好，因為個喉嚨好痛，痛到好易醒，訓左十幾個鐘，個頭仲重，個人仲攰，食左野同食埋藥再訓過，出左好多汗，反而成個人輕晒，好野，夜晚勁歌金曲有關淑怡，佢老左好多呀，唱歌 ok 但係點解咁細聲既？

星期一返工睇完票做左一陣野就頂唔順走左，再睇多次醫生，己經好左好多喇，但係個鼻仲係好塞同埋有耳鳴，左耳仲有 d 痛！

尋日憶蓮演唱會開始訂飛喇，我九點七就打通喇，好野，夜晚仲聽到憶蓮既新歌呀，超開心呀，今日東張西望有憶蓮尋日記招 d 片段同訪問，哈哈！