“呂大郎還金完骨肉”
第一場 行商訪兒
場景：呂家廰堂
出場人物：呂玉、呂玉妻(王氏)、呂寶、呂寶妻(楊氏)、呂珍。
呂珍(衣邊上)(撲燈蛾)(白欖)：橫禍驟飛來 家中逢變亂 姪兒往觀燈 未有回家轉 至今已四天 尚且人不見
恐防意外生 會遇到危險 鄰里與鄉親 協助訪尋不言倦 大哥與二哥 更似盲頭蒼蠅四處鑽
兩位嫂夫人 終日愁眉和苦面 時有啜泣聲 大嫂哭時二嫂勸 我守候在堂中 靜待奇蹟來出現 來出現
(埋位靜坐在大廳中)
(慢長才王氏與楊氏衣邊上場)
王氏(小曲三疊愁引子托白)：喜郎，我�乖仔，你去咗邊度呀？你快啲番嚟啦!
(唱曲) 心酸腸斷 恨繞愁纏 走到大廳前 痴痴苦盼望兒欲眼穿 懸念親兒 血淚倍添 消息零亂
未得串連 蛛絲索線 別巢乳燕 一朝遠飛直到天邊
楊氏(浪白) 哎吔 大嫂 你唔好喺度胡思亂想 不如求吓祖先啦
(接唱) 衷心求願 跪拜神前 只願大官快回來 願能盡快歸來伴你身邊
呂珍(浪白) 大嫂 你唔駛咁擔心�!
(接唱) 鄉親眾 已搜覓各鄉村
王氏(接唱) 卻是猶未見 心情未免憂煎
楊氏(接唱) 善因結善緣 神蔭庇 協助尋乳燕 不須痛哀 夢魂夢覺相牽
王氏(白) 唉針唔拮到肉就唔知痛 已經搵咗四日 仲未搵倒喜郎番嚟 喜郎只得嗰六歲 你叫我點樣唔擔心吖
呂珍(白) 大嫂 有咁多鄉親父老幫手 街上又貼滿告示 相信好快會搵倒喜郎�
楊氏(白) 係囉 亞大嫂你平時咁好人 又咁善心 相信菩薩都會保祐你好快搵番個仔�
王氏(口古) 個仔失蹤幾日 情況未明 我不禁心煩意亂。
楊氏(口古) 吉人自有天相 你又何必噎食難眠。。
王氏(口古) 都已經日落西山 何以尚不見夫郎佢回家轉。
楊氏(口古) 只係剛啱天黑 相信佢哋都會好快返家園。。
(呂玉、呂寶什邊撞點上)
呂玉(長句二流) 時光晚 返家園 步履浮浮身疲倦 訪尋愛兒不獲 終是未可團圓
呂寶(接唱) 汗淋漓 腳仔軟 可恨家逢不測變 姪兒何去本疑團 數日尋人 南北東西走遍。
呂玉(接唱) 千聲悲 萬聲怨 踏雪無痕小孤燕 聲沉影寂似龍潛 萬喚千呼 依舊人兮不見
(合尺花下句) 問誰能夠 解我倒懸。。
呂寶(合尺花上句) 已到家門(合) 待我高呼一遍。
呂寶(拍門介)(粗聲粗氣白) 開門 喂啲人去曬邊呀 快啲嚟開門呀
楊氏(白) 你睇 就講就到 真係準時過曹操呀
(楊氏往開門、呂玉(垂頭喪氣)、呂寶進門在堂中坐下介)
呂寶(白) 行咗成日 行到我脚又痛時身又燒呀, 三弟快啲去斟兩杯茶嚟俾大哥同飲
呂珍(白) 茶呀 哎吔今日唔記得煲茶(o忝) 不如斟兩杯水俾你哋飲啦
(呂珍衣邊卸下)
呂寶(白) 有冇攪錯呀坐喺屋企成日都無個人煲茶 真係唔知你哋喺屋企做乜(o架)
楊氏(口古) 姪兒唔見咗 成家人都已經心如麻亂。邊個有咁得閒 成日記住煲茶嚟招呼你個食飯神仙。。
呂寶(口古) 你唔做嘢仲咁多嘢講 真係不知檢點。我遲早就休咗你 以免你在此饒舌多言。。
(呂珍衣邊捧托盤帶水壼及兩茶杯出)
呂珍(白) 水到 水到 大哥二哥請飲杯水
(呂玉、呂寶飲水介)
王氏(白) 玉哥 你哋今日又搵咗一日 究竟點樣呀？有冇消息呀？
呂玉(反線中板) 執手望賢妻 愁鎖春山黛 只恨無一語可作安慰言。。骨肉痛乖離 連日來四野訪尋
總不見那離巢孤燕。昨日到西山 今朝臨北海 處處無音訊 消息亦杳然。。
喜郎相貌本端莊 福壽兩雙全 自應有驚無險。賢妻且釋懷 放寬心事 小心勤保重 勿惹病魔沾。。
(花)你切莫憂慮重重 且聽我良言相勸。
呂寶(口古) 離家四日 縱影全無 都唔知會唔會有乜衫長褲短。
楊氏(口古) 啋 好�唔靈醜�靈 你收埋把衰口 唔好胡言亂語在人前。。
呂寶(白) 唉! 搵咗幾日都唔見 可能一早俾拐子佬捉咗去賣都未定囉
楊氏(白) 聽你講落 又似有幾分可能喎 哎吔! 咁就弊弊都冇咁弊嘞
王氏(口古) 聽你哋講多幾句 我更怕有不測之變。
呂玉(口古) 娘子你不用擔憂 相信唔駛幾耐 就可以闔家團圓。。
呂珍(口古) 事到如今 大哥有否其他打算。
呂玉(口古) 我打算出外經商 順便到處尋覓 找尋愛子返家園。。
呂寶(減字芙蓉) 經商容易去 但邊度有本錢。。
(浪白) 你識唔識做生意(o架) 要俾本錢�喎
楊氏(接唱) 家無隔宿糧 只怕小販都做唔掂。
(浪白) 屋企仙都唔仙吓 又點可以做生意呀
呂玉(接唱) 向錢莊來相借 我願付利息一分錢。。
(浪白) 無錢可以問錢莊借 最多俾番多少利息啫
楊氏(接唱) 利息殊非輕 你條數點樣算。
(浪白) 等陣做埋都唔夠蝕 咁就唔做好個做嘞
王氏(接唱) 應該要審慎 萬事想週全。。
(浪白) 你想清想楚至好呀
呂寶(接唱) 衝動只一時 但係手尾會好長遠。
(浪白) 因住一時衝動 攪到爭人周身債呀
呂玉(接唱) 風險必須冒 因為士急馬行田。。
(花) 我今天終日思量 已有全盤打算。
呂寶(白) 究竟你想點樣做 你不如喺度講聲俾我哋聽吓吖
王氏(小曲寄生草) 君應說一遍 計劃如何能實踐 經商怎能覓愛子兩得並存
呂玉(接唱) 籌措唯靠問錢莊 經商賣布匹絲線共棉 太倉嘉定為路徑 先走一遍 細望留神和著意 訪那孤飛燕
呂寶(接唱) 勸君你 切莫留連胡亂轉 音書依時奉寄家中報安全
呂寶(白) 你唔好去太耐至番嚟呀 免得失蹤一個又再唔見多一個呀
呂玉(白) 咁就梗係啦 我每次出門 最多半年就會番嚟一次
王氏(花下句) 愛兒失蹤才四日 丈夫又想別家園。。可憐日夕倚門閭 望子候夫 難求一面。
王氏(白) 如此說來 夫郎你打算何時出門呢？
呂玉(白) 我打算明日便去錢莊借錢 一借到錢番嚟 我後日就會出門嘞
呂珍(白欖) 攪唔掂呀攪唔掂 (介) 不見了姪兒 家中立立亂 我哋幾個人 都係完全冇主見 只能有破壞 不會
有興建 怎能夠當家 亞哥你要重新來打算 來打算
呂玉(白欖) 事已到如今 急如弦上箭 生死與存亡 恐防差一線 若有半分遲 怕有不測險 不測險
王氏(白) 難道便不能多留幾日嘛
(呂玉嘆氣介)
呂玉(長句二黃) 飛來橫禍實無端 四野茫茫皆不見 骨肉親情難割捨 尋親好趁順風船 遇事若求成 當機須
立斷 倘若帶水拖泥 怕會恨海難填。。千里訪兒 但冀天從我願。
呂珍、王氏、楊氏(合唱二黃一句) 為免家人盼望 切記雁扎書傳
呂寶(白) 大哥自然會識做� 你哋唔駛慌
(各人自語詩白)
呂玉(詩白) 千里尋親赴遠邊
王氏(接白) 宵宵孤枕夢難圓
呂珍(接白) 闔家盼望能團聚
呂寶(接白) 此後家中我獨尊 (幕下) (完)
|
