又一個星期啦，今個星期有開心有唔開心
上星期六唔使去觀塘，結果朝早去咗元朗代堂
教英中BAND1 F.4
佢地上堂問咗我條比例題，我解答咗佢地
佢地話阿SIR考佢地，咁就又出咗題話考番佢地阿SIR
仲話會搵吓關於比例既有趣題目印俾佢地睇

講番學校，有一日閱讀堂同佢地玩數學黑泂
玩完之後佢地係到扮「千奇百怪香港地」
「有幾趣，請俾趣」，「仆、仆•••仆」，「爆趣」
「今日個問題係咩呀？」
咁我就臨時諗咗問題問佢地啦
真搞笑
最近兩日上佢地MATH都冇用到MIC
係好既跡象，代表唔使同佢地鬥大聲

有一次我話我廋，有個有些小肥既男孩子話俾佢個肚臍我喎

仲有係我第一次參與學校既考試卷
雖然唔係我出，但係我有負責睇份卷有冇出錯，有冇問題
但係經過佢地幾位老師CHECK過之後
我仲搵到有三個大問題，同埋其他小問題囉
三個大問題包括問題未夠清晰說明情況，沒有考慮極端情況及選擇題其中有兩個選擇是相同的
則係如果唔係我咁仔細睇過，份卷出咗街都唔知點收科

星期二去葵涌教班之後發生咗小小事
完咗之後負責既老師同我講咗D野，令到我即時好反感
反感到令我想快D完咗個課程，唔想再繼續有下一期
雖然我唔知唔開心D咩，但係都唔開心咗成晚，不過第二朝又冇事囉

到咗今日，去觀塘教班，有位女孩子反應了佢既不滿
不過佢既說話有D過份，我大約重覆番個重點啦
佢話：「阿SIR，你人工係咪好低架？點解你唔教野既？」
我心諗，你講D說話咁難聽既
人工高唔高同教唔教野有關係既咩？
係咪你俾錢出黎就一定可以買到知識先？
如果係D人就唔使要咁努力讀書啦，用錢就可以解決啦
佢話：「我之後都唔返啦，返黎都唔知做咩？你淨係俾練習我地做，又唔係教野，咁我同係屋企到做有咩分別呀？」
我回答：「教既內容你地上課已經學咗啦，如果我而家再講的話咪變得重覆囉
咁梗係俾你地做吓練習，睇吓你地識唔識到，有咩問題啦
如果你有問題我會答你架，係屋企自己做就唔一定搵到人幫啦
就算我係教野，你聽咗又代表有用咩，你唔肯嘗試做又點知自己係咪識呀？
如果淨係我講你唔做，只不過係紙上談兵姐，一D實際作用都冇
如果你聽明咗，但係發覺一題都唔識做，你會滿意咩？
問題唔係在於我教唔教野，而係睇你有冇心自己嘗試做，嘗試學」

聽咗之後都真係令到我幾唔開心
可能佢真係唔鐘意我而家依種授課模式啦
但係令到佢咁不滿仲話之後唔再返，其實佢講既野都有佢既道理
我自己都會反省一吓，嘗試諗吓有D咩方法可以幫助到依個女孩子
同埋可能係人夾人既問題啦
我個做法同佢心目中個想法唔一致，就會出現今日個問題
其實都好架，等我了解多D唔同學生既需要
等我將來可以幫助到多D唔同諗法既學生
無論如何，都要多謝今日位女孩子既真情說話呀