哈哈~原本打算聽日先打日記既~不過岩岩洗完頭,但又未乾,所以都係打埋啦~
嘩~昨晚超早訓,未夠十一點半就訓左喇~不過到左四點鐘就甦左喇~激死..........
起碼到五點幾先訓番呀~同埋我又唔係蓋好多張被,而且都係冷氣被,
但都唔知點解訓訓下,出哂汗,真係激死人喇 >,< 但今日又好精神喎~呵~
今日同草莓妹,小強,Parco去左旺角行街同睇戲,哈哈~睇"如果 愛",都ok啦~
不過我覺得就長左小小囉~如果短番小小就好喇~雖然套戲係講下依家,
又講下以前,但好彩我都知佢講咩,但真係好長呀~成兩個鐘~好耐都未試過睇戲睇咁耐,
對上一次都係同Jeff and Tony係元朗睇"3X",成三個鐘,仲耐.........不過好彩個時,
我係坐中間,我可以兩邊胳頭靠落去佢地到,先冇咁辛苦咋~哈哈~不過都好耐lu~
之後就去左無印良品,哈哈~喱個係一個指定去既地方~呵呵~
我又有野食喇~今次又係我既至愛"士多啤梨棉花糖",係小強買既~
因為佢上次話買俾我食既~呵呵~之後佢地就叫我聖誕節26號去西貢燒野食,
玩天光...........哈哈~我初初都冇諗會咁遠.........而且仲玩天光.............
我一定頂唔順啦,因為我以前就算玩天光,都係同Idy佢地係屯門篤波,
而且篤篤下,篤到三點幾四點個段時間,我就會自己坐埋一邊唔知自己係到做緊咩,
呆呆滯滯咁,人地同我講咩我都唔知,我都係到亂答一通~哈哈~
不過最盡個次都係篤到朝早五點幾就返屋企..........哈哈~所以我依家都唔知點好呢?
不過都唔知媽咪俾唔俾我去到咁遠玩就真.............哈哈~