轉自now.com
 

就是愛你驚奇之旅
TEXT：陸寶

真係癡0左總掣，平均一個月睇一場演唱會，今個月又走去睇陶吉吉，好彩買唔到側田，唔係就真係「紅館是我家」。上次陶吉吉個演唱會叫《SOUL POWER LIVE @ Hong Kong》，今次就叫《就是愛你音樂驚奇之旅》，又愛又驚奇？個名啱Alive用多D喎。

我雖然係睇200蚊飛，但大會就俾足800蚊音響我歎，超大聲，唔知係咪我坐個位對住D擴音器喇，可能見我坐個位全場要睇住陶吉吉頭頂個轉唱歌，比返多D補賞我0卦。

今次演唱會揀D歌同上次《SOUL POWER》差唔多，可能陶吉吉出碟唔密啦，劈頭第一首又係「找自己」，搵咁多次，唔知幾時先搵到。不過今次陶吉吉從天而降咁唱，又唔同D啦。我依稀記得第一個歌手0係紅館咁做0既係杜德偉，仲要係倒吊果隻，唉，上個世紀啦……如果我記錯唔該話返比我知。

今晚又再次經歷金曲之夜，聽到”Ice Ice Baby”(編按：90年代初rapper Vanilla Ice 成名作，殿堂級one hit wonder)真係冷震都打埋，不愧叫做「驚奇之旅」。原來來一客80’s/90’s舊歌，首首英美金曲，不過「一岩一忽」，都唔知可唔可以叫medley，都無咩重新編曲，原汁原味嘛。歌與歌之間都又無咩連接，就咁跳過。跟手再0黎Barry Gibb上身，大唱70’s Bee Gees之經典金曲，遲0下唔知陶吉吉會唔會上靚聲演鬥廳，同關菊英傾下計？

演唱會上有兩位老練之美眉和音，又唱又跳，又姣又艷，齋睇兩位表演，你會以為自己去0左海洋皇宮夜總會。仲有現場Live Video比我睇到陶吉吉個靚仔樣，不過有一兩首歌，有黃色歌詞字幕比大家睇住一齊唱，娘娘的，好似史前卡拉ok，只係爭0左D跳跳0下0既波波。

陶吉吉唱Live一大特色，就係有強橫既ad lib，唱ad lib扭到個音有咁長得咁長，首歌未唱到一半就0黎料，唱到首歌同唱片個版本完全唔同，有時想跟住唱都唔得，都估唔到陶吉吉先生下一句點玩法。

陶吉吉好識搞氣氛，完場最後首〈愛，很簡單〉就玩大合唱，玩鬥大聲，都玩成幾個字時間。Encore位〈就是愛你〉，唱到臨尾我就鬆人，唔想同人迫，學0下D大明星嘛。走到紅館出面，見到側田幫粉絲簽埋名，傾0左幾句，仲聽到紅館入面仲愛緊你，難怪既，上次演唱會最後一首歌「愛，很簡單」就玩0左7分鐘，今次無返咁上下點得呀。咦！埋尾又係「愛，很簡單」，呢首歌認真唔簡單。

樂手方面，一個個白衫白褲，外型上亦顯示出陶吉吉口味異常國際化；來自台灣0既總監，一個青色頭人彈bass，一個正宗blonde頭髮又長又柔順過莫文蔚0既歐洲男人，一個金毛星加坡人，再加個光頭印度敲擊手，視覺上就已經非常豐富，再加上專業0既中樂樂手，專業到無厘神氣，悶到頭都dup晒，悶到攞部手機出0黎玩0下SMS ……

陶吉吉手指傷0左就唔好彈結他，仲要揸pick彈，不如學0下白花油王子用羽毛球彈啦喂，幾有feel呀，「keep us together, for all time」！