2008年4月12日 重3.13KG(6.886 lbs) 長51CM

原先只係諗住入阮院check分泌物,點知變左生,都總算一切順利,唔駛係屋企搭的出廣華,真係日子岩岩好,阿仔你真係乖!!

(11樓東翼產科病房) 11號晚check左,無咩大問題,想出院又唔出得,一定要住返晚觀察,咁好啦,都係一晚啫,亦都諗住早上出得院,雖然半夜時個肚又實下鬆下,又陰陰痛咁,但都無諗係生得,阿仔係11號預產期,都無早產,諗住佢仲想係個肚到多幾日tim!!

大約7:00am,個肚係有規律咁痛同埋實,就打定電話俾老公,叫佢請假過黎醫院陪我!同房既其中一位媽媽,叫我快d同姑娘講,我話點都要食埋個早餐先,因好肚餓,唔食既話,到真係生時,會無力.

老公8:37am到左,不過我仲未生得,只係駁左部機聽心跳同埋記錄bb郁動,佢只有係出面等...一直等,得等到我9點幾,俾醫生check埋先落得地,走出去搵佢;老公一見到我,就驚訝我仲行到咁快,又咁輕鬆,我話因痛完黎,加上未係大痛,之後我又叫左佢去買早餐俾我食,醫院果份唔夠飽!!後來我睇開既助產仕小組既姑娘黎左睇我,個心都定d

我邊食老公買返黎既早餐,邊做運動,希望令自己可以快d生得,同埋生得快d;d痛開始黎料喇,一痛我就忍唔住彎左腰,仲黎得越黎越密&痛tim

大約10點幾到,覺得自己開始唔可以企喇,就叫老公落樓下食先,我就入返房瞓係床到,好彩早瞓返係床到,唔係既話,都唔知點算,d痛已經係痛到自己想攣埋一舊;

(9樓產前房) 到左11:30am,已經開左3度,就有嬸嬸帶我落9樓喇;入到產前房,心情突然好緊張,可能係見到有其他媽媽都係到痛緊,所以咁啦;到左12點,唔知係唔係緊張既關係,覺得d痛係痛過先前咁,但度數係無開過囉,姑娘仲氹我食lunch,仲話有雞髀食,好好味,聽到佢咁講,又覺得自己真係痛得黎又好肚餓喎,就想起身食啦,但起到一半,d陣痛又黎喇,攪到又瞓返低,等d痛過左先起身,起第3次身,先成功左,食到2啖飯+2啖雞髀肉,無奈地即又要瞓返低痛過痛又過左,就又好快咁起身,以防止無力生為由,又以食得幾多得幾多既心態,係咁放飯同肉入口!!但都唔係食得好多,d痛又密左痛左,最後我都係要瞓返低,叫姑娘俾氣我聞先得,痛左唔知幾耐,當時成個人痛到好想暈低,無奈係暈唔到,d痛會令到我醒返終於到左2:30pm,開到5度喇,見到平時同我產檢既姑娘,我即喊左出黎,就好似小朋友咁喊,又嗲佢,估唔到當時既自己會咁

隨後入左產房,無耐老公都入左黎陪我喇,個心定哂,不過都仲係好痛,好想快d生阿仔出黎!痛既其間,我將老公又推又拉又扯又打,唔係想架,可能當時太痛,又聞左d氣,成個人都high high地,好想整"冧"哂周圍既野,同埋想不醒人事幾次架喇,不過暈唔去,一想瞓著果陣,次次都係d痛即黎,有心唔俾我去死咁,但真係痛到想死囉!!

好努力咁放鬆自己架喇,但幾次姑娘都仲係話未生得,小b頭仔未見到,令我有d氣餒終於佢同我講:見到頭髮喇!!嘩,即時有返d精神,之後就好快咁生左阿仔出黎喇!!(b仔3點幾出世)

今胎老公除左陪產之外,仲可以剪埋臍帶,同埋係姑娘既角度睇我生阿仔出黎,對佢黎講真係一個難忘既經歷!!

雖然今胎係第2胎,理應生得好快先岩,但我用既時間同生第一胎時差唔多,唔同在於,生第2胎,d陣痛係痛過第一胎!!慶幸生埋今胎唔駛再生啫,2個已經夠哂數!!