2010年8月23號

琴晚同衰佬b睇完套戲就去訓覺.
不過上左床之後我一直都訓唔著..但唔知點解..
個腦就不停回想返過去8個幾月發生既事..
諗起仲有成星期先會見到衰佬唔知點解就喊...
但訓係媽媽隔離又唔喊得出聲...果一刻好想好想攬住衰佬喊..
衰佬返左上去之後都喊多幾次...就好似小朋友扭計咁...或姐我就係咁唔成熟....
衰佬返上去之後一個人係屋企感覺好孤單..好寂寞..
可能因為連電話都打唔到比衰佬...我感覺唔到衰佬既存在咁..
即使msn都覺得好遙遠...好遙遠...聽不見...看不見...摸不到...
每一晚訓前..每一日起身都好想喊...甚至喊過...果種寂寞..悶既感覺從來都冇咁強烈...
好多人同我講話當比自己放假...玩盡d...出多d街...
但係出街冇得sms...冇得打比衰佬..我就情願唔出...分隔異地既感覺真係唔好受..

咁耐以黎都未試過一返去就返成半個月咁耐...
仲記得果晚話不如你自己早幾日返...其實我心真係好想你會早幾日返...
即使唔係我度過夜..至少我仲可以聽你把聲..見下你...唔洗一等要等十幾日...
加上成日隱隱作痛...訓覺又訓唔到真係好想你係身邊..
不過算啦...我又唔可以咁自私...所以還是算...
只係一個人多一星期...還要捱下去..

每一晚訓前都一個畫面...就係上年12月24號衰佬偷偷地返香港唔話我知..
返到佢屋企佢掛住我掛到一直攬住唔放手..唔玩電腦...唔換3...
我都好想而家可以咁攬住佢唔放手...可惜仲要等一星期...
一個人既一星期好悠長..

頭先落街一個人去YMCA..一個人行去搵媽媽..一個人行樓梯返屋企..
冇左你陪我行.冇左你幫我抹頭...冇左你sms我...冇左你打比我..
短短四日我已經開始感應唔到你既存在...日子好難捱...好難過...
好想期待你返...但卻冇心情去起身過每1日

從來冇人返大陸我會咁掛住佢...我會咁難過每一分鐘..
短短既256日因為成日見..對我黎講感覺唔只得256日...
媽媽走前同我講左一句...等一個人係好辛苦架...
媽媽每晚見到我訓唔著...冇咩心機好悶就成日攪住我講..唔緊要啦1星期姐..
不過呢1星期已經係我19年黎最長最長既1星期...時間好似停左..日子唔會加上去咁...
諗起仲有12月..出年新年...復活節...好多好多日子我都仲要係咁...

等到29號之前..我相信我已經喊到眼又腫..訓又訓唔到既熊貓咁...
冇心機到冇胃口又唔想出街唔想講野...時間啊..你可唔可以過快一點...
或姐等我聽朝起身見到衰佬坐係隔離叫醒我也好啊...