好似幾耐之前係S1睇人討論JOJO

講到好似幾好睇咁，結果就去補，結果一補就係半年

睇左一睇，80卷，立刻囧左

skip左1，2部由最經典嘅第三部開始睇。

點解經典？因為替身呢個系統係第三部先開始出現，而替身呢樣野係能力戰鬥漫最神嘅系統。

第三部:

由於第三部嘅替身系統剛剛出，一出當然係出基本嘅能力先。

主角更係乜能力都無得個快同力量大但射程短嘅承太郎。

呢部嘅劇情感覺都唔係好好，有D似單元劇，基本係一直打打打，打完一個敵人繼續路程比第二個敵人陰之後應戰。

但替身呢個系統真係好正，有個完整嘅系統，仲要個個人物都鬼死咁聰明，即使係普通嘅能力加上鬥智都可以打得好精彩。

我睇漫畫唔係記到好多細節，係震撼嘅先記得，第三部好記得嘅係有個放黑洞(或者係破壞一切物質)嘅人，

果場打到殊死戰咁，原本以為係成部最好睇嘅一戰，點知打DIO果一場仲正。

花京院以死亡為代價話比承太郎知DIO嘅能力，差唔多一出場就全滅，承太郎為左等待機會而叫白金之星噤住心臟，DIO經典嘅放飛刀用壓路機仲有經典嘅無用無用無用無用無用無用無用。

一切都打得熱血打得過癮，最後承太郎醒覺白金之星嘅真正能力，可能以依家嘅眼光睇會覺得承太郎係普通靠好運嘅主角，

但係大佬，人地靠食腦無能力得個打一直打到去BOSS度喔，無能力點同時間停止打啊？

仲要雖然得到時間停止嘅能力但係同DIO嘅時間停止相比都係差幾多下嘅，最後都係靠食腦打贏DIO。

兩個人一樣嘅能力，加上打得咁好睇，不愧為名對決！

第四部:

日常生活嘅一部，間事點大都只係殺人狂之類，同之後或者之前比真係不足掛齒。

雖然同第三部都係遭遇戰咁樣，但加左生活嘅元素又真係帶來不同嘅味道。

而且替身嘅能力都變得多元化同有趣。

一開始JOJO嘅能力已經係同普通主角與眾不同嘅恢復能力，係恢復而唔係治療，令到主角可以出到血壓刀呢D又時髦又真係實際發揮能力嘅招式。

而回音呢個能力仲有趣，會進化仲要次次進化都可以玩得神，不過敗處係最後act3竟然係令物品變重呢D普通嘅能力，ACT2嘅將文字打入物體入面有相應反應仲好玩。

另外非戰鬥性嘅能力都好有趣，可以整出古怪料理嚟醫病嘅廚師，可以將人變左書睇人嘅經歷嘅能力都令呢部加上不少色彩。

第五部:

有D人話JOJO由3部有替身能力開始神，到4部到最巔峰。5,6部開始廢，但我覺得5,6部嘅水準都係好高(可能我蠢，5,6部嘅能力好多都搞唔明)

5部最出眾嘅唔係主角而係配角，主角都係同承太郎咁高大全，無乜深刻印象(反而仗助可能係故事生活化，角色影響更深刻)。

鋼鏈手指呢個能力真係超神！睇上去好似好簡單，但係配合使用者咁神嘅應用可以發揮得好勁！

布加拉提呢個人又係好聰明，雖然睇上去好似唔關心同伴但其實佢又可以照應到同伴又可以達成目標，最後死果下真係大為感動！

呢部我覺得好睇嘅地方係覺得劇情緊湊好多，一環扣住一環，第四部雖然好，但係生活化嘅故事帶唔到緊張感，

如果唔係吉良個仔可能仗助佢地都打唔到boss。

相反第五部真係好緊湊，真係不成功便成仁嘅感覺，同時間競賽嘅情節都成日出，同之前鬆散嘅劇情完全唔同！

第五部真係唔係人地評價中咁差，都有好多可取之處！

第六部:

呢部好快睇曬，好似一個月都唔使，呢部女子監獄嘅背景加上JOJO係女嘅呢點一開始唔係咁中意，但呢代JOJO嘅人物塑造我覺得係3-6部中第二好嘅(第一好嘅覺得係仗助)

替身開始超過我嘅負荷，有好多都係概念性嘅替身，貼紙果個女人嘅仇敵果個認真睇唔明- -

書同藝術品入面角色走出嚟果個好有創意好正！

最後果戰(其實係計新世界前定新世界後- -)無想像中咁好，反而天氣預報死果戰仲好睇！

天氣預報呢個角色原本感覺一般，醒覺左之後覺得唔係咁好，死左之後反而覺得天氣預報其實真係一個好人啊...

不過係處理呢個人物果陣覺得都係有奇怪嘅地方，原本係普普通通嘅一個好人，死左之後突然性情大變變左壞人諗唔明，

不過臨死一刻利用白蛇攞左只disc出嚟，之後徐倫攞住果一刻，真係好感動，最有feel嘅死係布加提拉>天氣預報>花京院

最後果個細路用翻天氣預報嘅DISC痛宰神父，果一刻無乜感覺，因為思緒仲係天氣預報死果度囧

替身越嚟越複雜，我覺得荒木都開始想改變呢種情況，最後整到最簡單嘅方法，reset個世界。

JOJO開始同喬達斯血統無關，而JOJO成為一個名號。

第八部嘅主角好似係吉良吉影，希望呢個新一代嘅JOJO同佢地嘅同伴可以有一場優秀嘅冒險！