其實大家應唔應為，呢個世界上，所有嘢都係有得解釋嫁呢？所有嘢，必定有因，先有果。我就非常深信，呢個世界上，任何嘢，都係有得解釋。只係你，能唔能夠解釋到，有無能力去解釋。

就好似一個好經典嘅問題：究竟有雞先，定有蛋先？

呢個問題，一定有答案。但係，只不過係究竟值唔值得你去追查個答案。

點解你會出世，可以有答案；你個名究竟點黎，點解你阿媽阿爸會改個咁嘅名？唔知大家有無唸過，思考過，甚至問過呢？

我好唔鍾意人地同我講：「無得解嫁！」因為，呢句，係一句敷衍嘅說話。只係佢唔想為你去追查解釋，只係佢覺得你唔值得令佢為你尋求解釋。或者，只係佢想逃避呢個問題。呢啲，都係我對人地講呢句說話嘅解釋，所以，係睇你想唔想去嘗試解釋而已。

就好似宇宙點黎，我相信一定有解釋；點解一個人會選擇離開你，都一定有解釋；點解你會長大，又會有解釋；點解你阿媽阿爸改個咁嘅名俾你，亦都會有解釋。點解呢個世界咁多freeware呢？膚淺嘅人會話，佢地白痴姐，但對我黎講，又係有第二個解釋。點解free free下又變咗收錢，又有得解釋。點解收收下又變返免費，又有得解釋；點解人要改變世界，又有得解釋；點解人又唔想世界改變，又有得解釋。

總之你夠膽問點解，你夠膽去追查，你願意付出時間去追查，你懂得怎樣去追查。你就一定可以得到你想要嘅，解釋。

同埋，解釋，其實有好多。例如點解你阿媽阿爸要同你改個咁嘅名？點解人要食飯，瞓覺？呢啲例子，都唔會只係得一個答案。

好似有一日我同個朋友(甲)咬：一個人無心，就咩都做唔成。有個朋友(乙)，考車肥咗。點解佢唔再考多次呢？有個朋友(丙)，學學下車又話唔學。

就呢兩個問題，我就同朋友(甲)咬：佢就用咗兩隻字 ─ 「無心」。但係我並唔係唔認同，我只係想將佢解釋得具體啲姐。

我就話：佢地考完肥咗唔即刻考過，或者學學下車唔學，係可以有好多原因。可能係時間問題，可能係錢問題，可能係第二啲問題。但我就肯定，一定有佢自己嘅原因。

所以朋友(甲)雖然話，「無心」就可以包括哂，講哂呢啲嘢嘅原因。我唔係話唔認同，但係解釋，我始終認為，唔會係得一個。只係解釋嘅情度，同你唔同而已。

我由細到大，都好鍾意嘗試去解釋我身邊周圍嘅事物，事情。我好鍾意去嘗試理解別人嘅心理，別人嘅所想。

中五時，有個阿sir同我地講："0"同"1"呢兩個數字，已經可以成為你大學學科嘅其中一科。我當時，我已經覺得，呢個世界真係好神奇。呢個世界就係咁得意。

我亦到見到我某大學的校訓：「明德惟志、格物惟勤」

嘩！我真係覺得自己超膚淺！完全唔明白呢八隻中文字係講咩！我平時睇字，好鍾意逐隻字去睇，再重新組織去理解成句講咩。我初時認為，大部份四字詞，都可以照字面逐隻去解釋。但呢八隻字，真係考起我。

原來，呢八隻字係咁解：「意思指我們必須立定志向，努力培養出祟高的品格；勤奮不懈地探求事物的原理。」

嘩！簡直，都係唔明點解呢八隻字點解會解釋成咁。可能係我智力問題，又或者我真係要睇多啲成語動畫廊，去了解佢嘅典故先得喇。但我都係覺得呢句嘢，實在太厲害，太有道理喇。我非常認同！