My dearest 陳小B,

10月13日 星期四

你好心急唔等e生叔叔約左既17號開刀, 就由媽媽個肚趕住出黎, 見你爸爸媽媽仲有我呢個蚊姨姨

個一日係一個陰天既星期四, 我同Joe哥哥如常地爬起身番工(你廿幾年後都要過同樣既生活 除非我發左達啦). 如常地我村口架小巴又係唔準時到. 到我上左火車, 如常地拎個電話出黎諗住上網睇蘋果日報, 就見到有個未睇既Whatsapp, 我仲以為係d書友仔又夜ma ma  group chat 啦, 我一打開, 首先見到你老豆話你出左世, 即刻嚇左我一大跳, 我好大聲向火車度"o下?"左出黎, 都唔理得其他人甘多, 跟住就比個電話Joe哥哥睇勒~! 之後原來仲有好多信息向你舅父, 老豆同我既Whatsapp group chat...

1013 1257 你爸爸同媽媽飛的士去醫院

1013 0147 你爸爸說你媽媽入左產房了 

1013 03xx 你爸爸話我知你出世了~~

你舅父係一個宅男, 個晚佢一直都無訓, 一路對住個電腦一路等你爸爸電話, 佢同我講你爸爸一點幾打黎個陣, 把聲好震好緊張呢; 你舅父一直等到5點幾, 知道母子平安, 先至去訓呀. 順帶一提, 你婆婆都有同你爸爸通電話, 一直關心住你同媽媽既情況呀!! 不過婆婆就唔捱得眼訓, 要覺覺豬的. 

***********

講番蚊姨姨自己先, 個日我如常番到屋公司, 同同事講左呢個消息, 甘多個姐姐姨姨都好suprise你早左趕住出黎呀! 哈哈哈~ 

個日發生左件好意料之外既事, 就係公司突然話要cut 花紅; 搞到公司入面甘多個姐姐姨姨都木口木面, 得我一個鬼甘開心仲笑得出咋. (因為知道放工可以去探你同你媽媽)

放左工, 我就飛81C(巴士來的)出黎廣華醫院睇你啦. 你同媽媽住向9樓南翼9號房6號床. 幸運地, 醫院的安排好好, 你唔洗同國內人迫埋一齊, 全房都係香港媽媽, 唔會又污穢又嘈又唔顧人感受. 

廣華醫院的探病時間係下午1-2, 傍晚6-8. 個日下午, 你婆婆, 舅父, 姑婆, 家善表姨(帶埋彤彤表姐 - 不過佢太細個唔入得去)黎睇你. (嘻, 我唔知有無數漏呢??) 到左夜晚, 就有我同 Joe哥哥, 你爺爺嫲嫲, 公公, 舅父(去完又去^^"), 契舅父&魚魚契舅母, 英傑表舅父&Wing表舅母黎睇你, 英傑表舅父佢地仲買左禮物比你呀~~

我等你食完奶奶掃完風, 就入去睇你同媽媽喇! 你游左九個月水, 所以出世第一日你手仔係巢皮架, 哈哈~!  你媽媽開刀麻醉生完無幾耐就比姑娘拍醒左, 唔比佢訓甘耐架! 所以我夜晚見到佢, 雖然佢未落床, 不過都算好精神好好中氣. 你呀媽好搞笑的, 見到邊個人探佢都問人地抱唔抱BB影唔影相, 佢當左你係迪士尼樂園既巴斯光年, 係甘比人影相呀!! 不過因為你太細粒喇, 唔係個個敢抱你架 當時已經係7點幾, 我睇左你同媽媽5分鐘幫你影左一張相, 就走番出去lu. 

其實我都唔知你似爸爸定媽媽, 不過大大下你個樣定d, 先至再睇下啦~!

走左之後, 我同Joe哥哥就同左你舅父去家樂食"易牙妙手"勒, 個魯肉飯好好食呀!

10月14日 星期五

俗語有云: Happy Friday!

所以呢, 呢一日蚊姨姨我係約左朋友仔聚會既. 約個陣唔知你會甘早出世, 所以呢一日我就特登同朋友仔改晏d個食飯時間, 甘就可以抽時間黎睇你同你媽媽勒~!

呢一日既下午, 依舊有好多長輩黎睇你同媽媽, 又有長輩拎野比你媽媽食. 係呀, 開刀生小b係一件好辛苦既事黎架. 你媽媽一直由朝到晚叫痛呀 (開刀傷口痛).

經過前一日既人山人海, 我有哂心理準備今日都好多人去, 可能去到醫院都探唔到你地. 點知我去到病房門口, 一個熟人都見唔到wow! 甘我就好似前一日甘樣, 推門入去同嬸嬸講幾號床咩名, 跟住佢又會叫我用消毒液洗手. 原來呢一晚除左你爸爸無人黎呀(不過後尾你公公又過左黎), 哈哈哈, 我可以"霸"住你拍片同影相勒~!! 仲可以摸下你手仔面豬仔(第一日唔夠時間做甘多野呀!!) 第二日你戴左手套仔, 你爸爸媽媽話, 你係甘抓自己抓損哂個面豬呀! 好在佢地有帶手套仔比你咋~~!! 我有抱你架~! 6磅幾既你, 輕飄飄, 我覺得好似抱豆腐甘樣. 同埋你未開眼仔, 不過可以睇到你隻眼好長~ 應該都係大眼仔~@@~ 我地拍左片片架, 我成日睇完又睇睇左好多次, 而且好多年後都可以重溫架. 你呀, 蝦大人架, 甘細個就識得向度喊喊扭抱, 你爸爸忍唔全抱你, 你就即刻收聱=="

你媽媽終於落左床喇, 不過行唔到, 座左向張凳度咋. 呀媽媽話, 佢第一次嘗試落床個陣, 直頭好似抽筋甘, 又係甘震, 要嬸嬸同姑娘扶番佢上床呀!! 其實你媽媽由細到大都怕痛又怕打針, 雖然今次佢唔可以順產生你, 不過今次佢真係算係甘大個女最痛個次喇 (我估...) 

這個是你出世第二天的size (正確黎講係41.5小時)

小b, 你打拳呀?

10月15日 星期六 

呢一日好好天呀! Sunny Day

呢一日我無睇你同媽媽呀, 因為我朝早要番工, 收工已經一點仲要搭車, 都趕唔到去睇你!! 甘所以我就按原定計劃, 同你爸爸安排做運輸勒!! 話說你父母為左安排你出世, 屋企要大執呀~! 甘婆婆個張細疏化床就搬去你屋企, 甘岩蚊姨姨又要向婆婆屋企搬個架同埋要去你屋企拎張電腦凳, 所以就call貨van車哂d野你屋企, 我再call貨van車哂d野番上水~

我仲見証住你爸爸, 好辛苦一個人行好遠去貨倉度, 拎哂兩張幫你訂造既床肉仔呀. 真係身水身汗架~!! 之後地我就去左食下午茶, 個沙律都幾好味 

番到你屋企都已經好晏喇~! 你爸爸就忙忙碌碌, 整野食準備去探你媽媽. 向等緊個陣, 你媽媽通知你爸爸, 你雖然黃膽責界, 不過星期日都可以出院番屋企. 甘我就自動請櫻要幫手接你地出院喇!! 呵呵呵~ 其實你爸爸都好辛苦, 你早左幾日出世, 所有野突然間要提早做, 屋企都要拿拿臨做簡單既清潔, 又要鋪床單比你訓. 哈哈, 佢係你永遠榮譽阿四呀!

我向你屋企等Joe哥哥收工就一齊搬野番屋企^O^ 原來4,5點係好難call貨van架!!! 我call左五個台, 先至有車番上水, 不過都好好彩, 唔係好貴, 貨van哥哥收左我$150姐~ 

10月16日 星期日 

呢一日, 本來我係計劃早d起身做下家務溫下書, 11點出門口, 12點幾去到醫院接你既.

後來你媽媽9點幾打黎叫我早d去, 我就改為食完早餐10點就出門口, 11點幾去到醫院, 原本預計2點就走得架啦, 結果搞到5點先至走......

我一路陪住你媽媽, 後尾你爸爸到左, 1點個陣你姑姐同佢男朋友又黎左睇你. 其實見住你呢舊豆腐, 時間都好易就過左. 我又抱多你一次, 第4日既你真係重重實實左好多啊!! 唔再似一舊豆腐了.

呢一日, 我終於見識到小b你個真面目. 第一次見到餵母乳咋. 你媽媽話平時你都曳曳架, 唔會好好地甘食, 5次有2次係乖. 不過, 蚊姨姨睇你食左兩餐, 都好乖喎! 你應該天生係扮野王黎架, 有人向度就乖, 成日擠眉弄眼扮哂野, 幾日人仔就表情多多. 人地講野又會"射呢眼"望住. 我仲見識到你"喊破喉嚨"個個樣, 話真係好勁喎... 不過個個bb都係甘架啦. 而且同房既bb會輪住喊, 扭食奶奶扭呢樣個樣, 都幾得意喎~! 

你媽媽就精神不錯, 當然仍然不停甘叫痛. 不過呢一日你媽媽不停話醫院d姨姨貼膠布貼得唔好, 搞到佢扯住皮膚.

因為藥單有小小問題, 我地三個大人就要一直等, 等搞完d手績已經兩點九, 你媽媽為左好好照顧你, 飯都未食都要上埋醫院個"沖涼班". 我就同你爸爸, 向醫院張長凳度呆座. 我都有趁小小時間溫下書架~! 小b, 其實個張凳好"銀"我背同pat pat架. 不過你爸爸話比起佢等你出世個張凳, 已經算好好坐架啦!!

出院個陣, 你父母唔知點解勁多行李, 足足有1車仔+3袋!! 人地個個都係一兩袋架咋. 好在有我向度.我覺得出院呢一日係好值得紀念既, 剛好又係星期日, 我點都要跟埋去影下相既. 我地一行出病房, 你就開始眼仔碌碌四圍望. 哈哈你真係活潑~! 我幫你地一家影合照, 你竟然識得望鏡頭, 好野~! 你媽媽話, 珊姨姨話bb仔一出世係唔知自己出左世個wow! 你唔通以為自己仲向媽媽個肚入面游緊水? 

落到樓下爸爸截的士, 媽媽就企埋一邊. 佢係甘同你講野, 我向隔離聽就覺得好搞笑囉! 佢竟然同你講呢度係香港你係香港人, 我真係比佢激死!!! 佢仲有同你介紹太陽伯伯架....  搭的士個陣, 其實個司機都好好人, 會揸慢d同埋有留意番個冷氣有無吹親小b你. 反到屋企, 我都有捉住你爸爸媽媽影相, 入門口個陣仲幫你地拍片架!! 不過你向的士個陣, 已經訓著左

其實, 仲有好多好多有趣既細節可以記低比你知架,. 不過, 我打字打到好攰喇

***********

你睇下, 你一出世就有成村長輩錫你照顧你掛住你架喇! 數下你媽媽呢邊既親戚先, 你有公公婆婆蚊姨姨Joe哥哥同舅父.

公公個邊親戚有有太婆,伯婆伯公, 2個姑婆, 7個堂阿姨3個堂舅父+2個堂姨丈, 5個表舅父+2個表舅母 (其中1對表舅父+表舅母向日本呀), 2個表姨+2個表姨丈公. 小b, 同你同輩既有堂家姐x2, 堂哥哥x1, 表哥x2, 表姐x1.

另外婆婆個邊既親戚有太婆太公, 舅公3個+舅婆2個; 表姨婆3個+表姨丈公2個 , 表舅父2個+表舅母1個(呵呵佢都係上個月先剛剛成為你表舅母咋!), 小b, 同你同輩既... 未有喎! 你一出世就做左大佬喇! 第時要照顧番d細既!! 

你爸爸呢邊既親戚, 我只知道有爺爺+嫲嫲+姑姐&Uncle+叔叔

希望你長大左之後, 會有一日睇到呢篇blog啦. 你知啦, 你阿媽好無記性架, 耐左既野佢會唔記得架!!

小b, 希望你健健康康啦!!! 

今晚, 我就要考試(IMT)喇~! 希望我考到好成績啦~~~  

Cheers, 

蚊姨姨