返嚟啦! 今個探親團真辛苦又驚險, 不過最終都係開心嘅:

第一日: 原本打算一早起身搭早車上,點知太眼瞓,所以遲咗,跟住又同嫲嫲,Daddy,媽咪,姑姐,亞健,亞施佢哋飲茶,搞到要搭3:30pm班車,返到已經6:30pm...一落車我同老公諗住再打的去姨仔度...點知等極都無...一係有人,一係拒載...搞到我哋都唔知點算...唯有搭我最鍾意嘅人力車......排除萬難終於去到...姨仔落咗樓嚟接我哋&幫我手抱Him Him上去, 好乖嘅Him Him一見姨仔就肯比佢抱,無扭計...上到樓一開門已經有一隻好熱情嘅狗嚟歡迎我哋,初時我都怕Him Him會驚or隻狗會咬佢...點知佢哋一見如顧,好鬼老友...之後我哋同姨丈姨仔一齊去食飯,D嘢食好鬼好食,食到摟住個肚,可惜亞敏無去(因為約咗同學)......

    我個Friend

第二日: 我哋一家三口,姨仔&亞敏一齊去咗長隆個動物園玩(諗住比Him Him睇多D嘢,雖然十分熱和辛苦但見到Him Him咁開心都值得嘅, 不過個衰豬又發揮佢嘅本性...週圍同人Hi & 飛吻,搞到D姐姐鬼咁開心,還請糖比佢食,回程後就同姨丈,姨仔&亞敏一齊去食潮州嘢,好好食,食到十分飽......

第三日: 今日可以瞓遲D起身因為無咩行程, 只係姨仔和亞敏同我哋約咗舅公,舅婆,表姨佢哋一齊出嚟飲茶...跟住上咗舅公屋企坐吓...點知him him一上到去就好唔客氣咁走來走去,又入房...不久佢重(賴)咗屎,搞到全間屋嗅晒,於是舅婆就叫我同佢用花灑洗吓,搞到好似喺度沖涼咁,真失禮...搞掂晒之後...點知個衰仔唔夠一陣又(賴)過...真係激死我,跟住我就再先抱佢抹咗個Pat先...點知抹抹吓突然覺得有D唔對路,點解個身暖暖哋.....嘩!原來個衰仔喺我度(賴)尿激到我差D暈低...佢呀!(賴)到我衫又濕褲又濕,行出街人哋唔知以為係我(賴)尿, 好彩天氣十分熱好快就乾咗...之後再去姨仔佢哋間新屋,地方好寧靜,好似香港的私人大型屋苑,間屋雖然未裝修好,但個景觀OK!喺望會所&泳池,間屋比舊屋還要大一點,姨仔話下次返嚟可以同Him Him喺樓下游水...到咗夜晚我哋一齊去食小肥羊真係好鬼正,食到好飽呀! 唔知香港間係唔係都咁正呢?(我同老公都未食過香港間小肥羊)...

第四日: 因為約咗Daddy,媽咪, 亞健&亞施佢哋喺碧桂圓,所以我一早起身收拾行李,而Him Him就好似知道今日要同佢個friend say goodbye咁,一起身不停週圍找隻狗同佢玩,食完午飯後我哋都好依依不捨咁搭的士走人...車程都十分長要兩個多鐘頭才到...期間個司機建議我哋轉順德當地的士會熟路D,佢有D唔太熟,不過我哋無接受,因為這些地方我哋已經唔識,點會夠膽搭D不知明的士,於是就由佢照樣車我哋去,點知佢真係不但不太熟路,見到右邊有條路寫碧桂圓,我哋已叫佢入去試吓啱唔啱,點知佢怕會錯,走照行大路一直去,連打電話比亞施個亞爸, 都唔知我哋去咗邊, 司機唔識路又慌, 我哋連順德都未去過重慌...此時只有一路直去,我知再走就只會走遠咗, 但無辦法一路無得返回頭,心諗有D後悔嚟咗,現在只好聽天由命...嘩! 嘩! 嘩! 終於見到回旋處可以返轉頭了,真係開心到由個心大笑咗出嚟! 直到見到亞施個爸爸出嚟接我哋,嗰刻心情好似見到好耐無見嘅親人一樣,可能之前太慌...,同佢哋各人會合後,就再去會所食飯, 今餐一樣又好味又好飽...飯後個個返去開枱打麻雀,我都有玩一陣,初時輸咗小小,好彩最尾比我贏咗成世人第一次嘅位位十六蚊,不過成晚都唔知自己打咩!只係有師傅指點...

第五日: 飲過早茶,碌過寶齡球,再吃個九大鬼午餐個個飽到暈咁返去收拾行李走人...

就係咁完了我哋今個行程......