去完camp，超開心囉！我地成班人都勁HiGh，雖然D教練好變態，日日都要罰我地做體能，但係都好多謝佢地，因為我地成班終於學識團結、信任、珍惜、感謝…何sir，我地以後都會對你更加更加好！
29/11
第一日，我地去到後，就被人趕左D冇交功課超過2次的人去做體能(當然包括我啦…汗！)，首先要圍住空地係咁跑，跑完又要蹲下，手點腳跟，一路好似鴨仔咁行，重要我地做掌上壓，當時我都覺得沒甚麼，但係返到去禮堂，D教練要我地互相用手捅頭，我超唔鍾意人地用手打我個頭，個死人張X賢就一野超大力咁捅黎我個頭到，當場我真係好想哭，真係~!@#()_+(因為不雅，所以此處需要消音……)，不過好彩，之後都冇叫我地再捅人……集隊後我地分班玩，要步操，諗班既口號(1234，廖寶珊既2E班，個個都係好學生，乜都贏哂其他班，YEAH~~)，重有要我地在十步範圍內見到老師、教練就有"禮貌"地講午/早/晚安，中途其實係比個教練係咁罰做掌上壓，好似重要自己用水濕頭，因為我地冇精神，叫得唔夠大聲……
後來我地去左籃球場玩遊戲，要我地全班每個同學都要用個鼻點個球仔(個球係好高既地方)，限時15分鐘，我地頭個幾個都幾好，跟住因為冇士氣，所以比教練係咁罰原地跑，到最後重差D超過時間，因為其他班都完成，不過好彩，最後我地完成時間係14分54秒…(好險…)，跟住我地就好開心咁去食飯，不過D教練要我地唱校歌，唔唱唔比食，我地要自己收野，重要同老師、教練按摩、收野……我成日有個錯覺，覺得老師係想享受這"五星級"的旅館，所以先黎，而我地就係超可憐既非法童工，唔做就要比D大老板罰……
之後我地就玩"過電網"，我地都算合作，不過D同學好容易就點到個條繩，所以…最後我地玩輸左，因為唔夠時間，教練係咁罵，重要我地出去吹風吹到12點(個陣好似係10點半…)，我地就咁沉默地企係出面，我個陣真係超唔鍾意個教練，到最後有另外一個教練叫我地檢討一下，我地圍圈講，但係一路講，個氣氛就越差，因為我地分開左兩派，激動個派話膽小派唔好，成日唔講野，又唔幫手講加油，所以先會比教練罰原地跑，以致冇時間玩完，但係膽小派又話激動派樣樣都針對佢地，一出聲就話，所以唔講野，到後尾，教練叫我地去空地吵，話我地一D都唔團結，只係識講對方既唔係，我地聽完都好慚愧，最後雖然兩邊都團結左，個氣氛都好左好多，但係我覺得其實我地心裡面都唔係好信任對方，不過大家都冇人說出來，突然間我唔知點解，就抬頭望上天空，嘩~~成個天空都係星星，我唔知點形容，總之就係好好好漂亮，成個營裡面，我真係最鍾意D星星，因為城市根本都睇唔到咁多星星……
返到去禮堂，發覺其他班都玩跟Disco(我唔知係咪咁串，自己拼音啦~)，我地去到都一齊玩，個場真係好HiGh！我地一齊跳舞，一齊唱歌，之前個D問題都冇哂，一路跳呀跳呀…最後跳到差唔多12點(灰姑娘……)D教練息左D音樂，叫我地返房，不過因為我地係玩得最差個班，所以我地冇得選房，不過我係同寧寧、端活、靜靜、穎緣、穎彤(唔係我呀~係另一個穎彤啊~)、穎琛、飯小琳一間房，雖然房就唔算好大，得4張上下隔床，一張長台，一個廁所、一間浴室和一個露台(對住個草地，都可以睇到少少星星)，個地下重未油，我想係因為那兒只開了兩個星期，好多野都未整好吧…？我地沖完梁，就訓囉…(已經1點幾…)我初初都訓唔着，後來可能因為好累，所以都訓着左，第一日就完啦~~ zzZZ~~~
今日就post住咁多先，聽日再post第二日啦~
2/12
| 
