琴日係畢業禮.
哈哈~~我有幸代表中五級既學生上台致詞呀!!!
當收到呢個消息既時候..我係長洲camp緊- -
都有D突然- -
琴日講既時候..表現都唔錯~~
好彩有林浩賢同埋鍾文龍一齊諗個份講稿咋!!
如果唔係都唔咁講得咁好- -
真係多謝曬佢地!
哈哈..
琴日有好多人讚
咁大個仔第一次比咁多個人讚..
有D開心添..
校長啦..老師啦..嘉賓啦..連同學都有..
真係開心死我...
其實..我都幾享受上台講野個一刻嫁喎...
各位嘉賓、校長、各位老師、各位同學：
大家好，今日我好榮幸代表中五級畢業生講呢個畢業致詞。係我既印象中，可以企係台上代表畢業生發言的，通常係一啲優秀傑出的學生。但係我唔係典型既優異生，學業成績都唔係特別優秀，課外活動的表現也不特別突出，但是今天我竟然被選中站在這裏向大家講話，所以都感謝學校比咗好多機會唔同既學生。
我地作為既末代會考生，呢個名詞令我地背負住更多既壓力，個個都話我地只能夠背水一戰，唔會有第二次機會，所以我覺得我地係與別不同既。曾經我都埋怨過，覺得好唔公平。可能正因為咁，先顯得特別深刻。大家都好努力都好團結，所以，面對任何事都好，與其埋怨不如努力做好自己，唔好令自己日後後悔。
畢業對我來講，曾經係一件好遙遠既事，至少會考之前，都冇諗過時間真係可以過得咁快，而而家到我企係呢個台上，再諗一諗過去咗既五年，原來自以為會唔太在意既畢業，到真係來到既時候，自己真係好唔捨得，再都返唔到去既五年。
喺呢度，我地的確見證左好多野，由有到冇，由冇到有，一切一切都值得我地懷念，當seetv由成立到而家已經成為我地嘅一部分，當新翼大樓變到已經唔再新，當2樓嘅locker位置變做班房！
講起，唔知大家仲記唔記得之前既locker係邊度呢？又記唔記得放學時候，擠到水洩不通既情況呢？每個同學都拎住自己既書係２樓，向locker個口係咁塞係咁塞，對於一啲比較細粒既同學，高既locker無疑為佢地帶黎挑戰，不論係跳跳下咁放，"銀"高腳咁放，又或者賈手於人！總之要將本書放入locker入面．而放書同時又要留意人地個locker道門，唔係既話分分鐘中頭獎！呢段時間可以話係全校最親密既時候。
而另一個深刻既片段，就係旅行日．一年一度既盛事，又係同學期待己久既日子，我地著住七彩顏色既班衫，浩浩蕩蕩咁出發，係學校，到左操場集隊時候，又見到劉副校，流曬汗咁指揮交通。而到咗目的地既時候，有時連阿ｓｉｒ／ｍｉｓｓ都要幫埋一份，幫手霸鑪、透鑪等，呢種同同學，老師打成一片既相處方式，亦係我最難忘既同埋懷念既！
初中嘅時候，總覺得時間係揮霍唔完，以為可以一直持續落去，但係當一次次春去秋來，五年嘅時間來到呢一刻，我好感激我身邊有一班好好嘅同學、朋友陪伴我一齊讀書，一齊捱夜，一齊玩樂！
係往後既日子，咁既機會已經唔多，往事已成回憶，但美好既回憶同埋師生既祝福卻長留係心中。
回顧五年嘅校園生活，我想代表所有畢業生先向所有老師講聲多謝，因為作為末代會考生嘅我地，我知道你地都曾經為我地擔心過，著緊過，一次又一次嘅鼓勵，一次又一次嘅訓誨，令我地有所成長。而亦因為有你地嘅陪伴，校園嘅生活先至精彩而不致於無助。你地既春風化雨都暖透咗我地既心！係呢度，容許我再講多次：多謝。
最後，我希望同學往後既路，可以順順利利，就算遇上挫折既時候，請唔好覺得孤單，因為你係從呢個門口行出去既！５年前你或者可以軟弱，但係５年後，你要帶住章中永不放棄既精神，勇敢迎接屬於你自己既挑戰！最後係呢到祝老師身體健康，工作順利。祝同學，前程錦繡。多謝。
| 
