有好多人都問，如果除咗化個底之外，
俾你揀多兩樣，你會揀咩呢？
我就會答唇膏同胭脂！
點解會揀呢兩樣？
因為呢兩樣都可以令個面色好啲，紅潤啲，
淨係用呢兩樣product都已經差好遠！
而且返工有時好趕，咁可以好快出到門口，
唔知大家有無同感呢？

上次就講咗唇妝潮流，今日就到胭脂喇！
好多品牌都出咗好多新色，等我為大家介紹下啦！

大家用胭脂係唔係多數直接掃上面呢？
其實呢個方法唔係唔岩，不過個效果可能比較實！
所以今次就教大家一個方法，
用掃印攞，之後再用掃拍上面，
慢慢印上去，顏色會soft啲，同均勻啲。

Chanel Fards A Joues Poudre Power Blush $380

Chanel胭脂，我相信有好多女仔都有用過，
今次就新出咗兩隻色，啡色同淺粉紅色，
啡色其實並唔係影相出嚟咁深色，係淡淡地，
呢隻色不但可以當胭脂，仲可以用嚟做shading添，
出嚟效果仲好自然架∼

而我就試個淡粉紅，
分別試咗掃咗一層同兩層分別俾大家睇！

呢隻淡粉紅真係好靚，好自然，
好似皮膚慢慢淡出嚟∼
好岩皮膚白嘅朋友！
粉質都係好幼滑，好上色而且持久，
胭脂有少少shimmer，好低調，
仲有淡淡白茶花味，
本人非常喜歡！

Diorblush 亮采胭脂 ＄390

Diorblush 今次出咗三隻新限量色調，
淡橙色，鮮橙紅色同淡粉紅色，
三隻色都好靚呀！而我今次就試個鮮橙紅色！

胭脂連埋個掃，毛質都好靚好soft
方便帶出街補妝，
而呢款甘鮮色嘅胭脂真係好少見，可以買嚟備用，
但大家可能會覺得會唔會好誇張呢？
其實只要用上面教大家嘅方法，就好容易影控制啲色架喇！

本身胭脂比較鮮色啦，
所以掃一層已經非常上色，
如果有party，特別日子就可以掃兩層，
不過眼妝就要淡返啲，影相出嚟就非常靚∼
而胭脂係帶少少閃片，粉質都好幼細，
亦都唔易甩∼

Lunasol Coloring Cheeks $230 (refill)

Lunasol胭脂賣點就係混合咗三隻色，
做出一個好有層次嘅效果，
而且都係走自然路線，
如果唔鍾意太鮮色就可以考慮lunasol喇！

而今次就試最新出嘅soft rose色

大家可以睇到個效果真係好自然，
好岩返工，OL用或岩岩開始化妝嘅朋友，
而且佢個層次真係做的幾好，深至淡，
唔需要太多技巧都可以做到深至淡。
都係有少shimmer，都好顯色，
不過因為顏色淡，掃多幾次都唔會怕重手咗！

RMK Sheer Powder Cheeks ＄370

唔知大家有無睇過佢最新RMK嘅print ad呢？
個妝最吸引到我嘅就係佢嘅胭脂喇！
感覺真係好紅粉菲菲，十分吸引。
而RMK新出咗一個色調就係鮮粉紅色，

顯色度真係同廣告個model差唔多，
非常易上色，帶少少閃，
質地非常幼，掃一層都已經好夠喇！
搽完真係感覺好少女呀！