十個有九個半女仔都想要一對又大又圓嘅雙眼，
其實除咗直接去割雙眼皮之外，
我就鍾意比較自然嘅方法，就係貼雙眼皮貼嘞！
雙眼皮貼對我嚟講真係好重要，因為我本身比較眼腫，
眼皮比較厚重，所以每日必定要貼咗雙眼皮貼先出街，
塭我試用就啱晒啦！喺上一篇《雙眼皮貼大比拼》
我地同大家試用咗五款來自唔同國家嘅雙眼皮貼，
今次等我再接再勵，再同大家試多六款啦！

呢隻少女型嘅隱形雙眼皮貼係奶白色，形狀屬於前粗尾尖，
（但同包裝上印有嘅款好有出入，粗咗好多！）
膠紙表面比較滑身，痴力比較弱，
如果唔係熟手會比較難痴，因為一痴錯咗就要用過新一張，
同埋佢前頭比較粗，所以會露晒個膠紙出嚟。
總括嚟講，呢款無咩特別，所以唔太推介。

推介度：＊

呢款淑女型嘅第二代美眼貼，同頭先嗰隻都係一樣奶白色，
佢痴力承托力都OK，膠紙表面比較滑，
唯一一樣唔好嘅係比較難上眼影，一上眼影就穿崩，
不過以佢嘅價錢嚟講都算抵！$10有成30對！
適合唔化妝而又想調下眼型嘅你。

推介度：＊＊＊

呢款Solone隱形媚眼貼啱晒超鍾意眼圓嘅你。
佢係咁多款膠紙當中最闊嘅一款，
一貼咗上眼有「嘩」一聲嘅效果，雙眼皮位明顯咗，雙眼即時大咗，
膠紙係透明嘅，表面有凹凸紋，較易上眼影，真係唔錯！
由於佢比較闊身，要裁剪一下先可以完全隱藏。

推介度：＊＊＊

呢款少女型嘅悠貝莉雙眼皮貼嘅包裝最吸引我，
因為包裝紙上面印咗個靚女樣，Model對眼真係吸引到我喎。
試上眼更加鍾意，痴力夠，承托力強，痴上眼好自然，好啱我眼形。
不過我真係對隻眼皮貼好有要求，除咗貼咗上眼要靚之外，
我都會好注重方唔方便我使用，佢呢隻唯一唔好就係有啲難「Mit」出嚟，
膠紙與膠紙之間無空位，好容易唔小心就「Mit」咗幾條出嚟。
總括嚟講，除咗難「Mit」啲之外，我都好鍾意呢款，好推介俾大家。

推介度：＊＊＊＊

呢款熟女型嘅悠貝莉雙眼皮貼，
佢同頭先嗰隻係同一牌子但唔同款。
（但我真係好想問，點解Package會差咁遠呢？
果然少女嘅我真係鍾意睇外表∼）
呢隻熟女型比起頭先少女型嘅膠紙更長，
其他基本上係一樣，一樣痴力夠，承托力強，痴咗上眼好自然，
不過因為佢太長，所以唔太啱我眼型。
同頭先嗰款一樣，佢張張膠紙都緊貼住，好難「Mit」出嚟。
總括嚟講都唔錯，會比較適合長眼型嘅朋友使用。

推介度：＊＊＊＊

最後呢隻3M Pink Lady雙眼皮貼，我係好推介比大家，
佢貼咗上眼係超自然，又Fit晒我眼形，無露邊出嚟，
痴力又強，好挺身，又易「Mit」出嚟用。
呢隻係咁多款當中我最鍾意嘅一款，
佢價錢又平，$14有30對，真係抵玩。
對於初學者嘅人嚟講都好易上手，用嚟練習多幾次都唔會肉痛，
真係好推介呢款比大家！

推介度：＊＊＊＊＊