經常上開網嘅我哋，
成日都見到好多人推介呢樣推介個樣，
老實講如果樣樣都買晒嘅話，
我哋實破產呀！
（尤其跟開Janice，基本上咩品牌出咗新嘢我哋都好快知道。）
好個方面諗當然覺得好正啦！
但對我哋嚟講有時都係惡夢……
（因為我哋無品牌資助丫嘛！）
加上我哋一試到啲新嘢好用嘅話，
就忍唔住互相燒下大家，
最後結果就梗係大家都燒著晒一齊去買啦！
正正因為咁，我哋就開始成日四周搵下平嘢，
一試到好用嘅就推介比大家，
今次我哋4位同事就一齊分享下，
最近用過覺得好用同又平嘅產品比大家啦∼

Irene推介:

廣源良菜瓜水 ＄18 （購自卓悅）

我諗好多姐妹都有聽過佢㗎喇，
有好多敏感皮膚嘅朋友都好推薦佢，
皆因佢不含化學成份，主要係萃自天然絲瓜莖。
有有保濕、滋潤、清涼之功效
佢質地好水，有淡淡絲瓜味。
而且用途非常之廣，大家可以用嚟做toner濕敷，
特別天氣熱或被曬傷時用，有鎮靜皮膚功效。
而呢款噴霧式包裝就啱哂嚟緊夏天，
係冷氣地方或outdoor都方便攜帶，隨時攞嚟噴面補濕，

最重點係佢夠哂平，
＄18就有一支50ml噴霧加50ml補充裝，
你話係唔係超抵用？

Jellia推介：

日本最新目元美容液護眼霜 ＄42 （購自卓悅）

記得吸引我買佢嘅原因，第一當然就係佢價錢平啦，
二嚟係佢成份，佢好清楚寫明成分，
當中有維他命E，美白精華同魚鯊稀成分，
可以做到補水又可以美白，
聽落好似幾正咁！

佢質地好水，唔會笠，易推開，
用咗個幾星期，覺得佢都幾補濕，
但美白效果就未睇到，
（合適比較年輕嘅人用，
眼部較乾嘅人補濕度可能未必夠。）
總結以＄42呢個價錢就買到枝眼部美容液都覺得好抵啦！

用法都好簡單：
Step 1: 用第四隻手指囉一粒米份量嘅美容液就足夠
Step 2: 輕輕點上眼周
Step 3: 用第四隻手指由眼頭開始輕輕按
Step 4: 用第四隻手指由眼頭開始至眼尾輕輕按下，有助吸收

Joan推介：

Naris Up Day Keep 24小時持久眉毛膏 ＄55 (購自SaSa)

我不嬲齊陰都唔鐘意搞條眉,
好怕d頭髮撻住溶左都唔知,
但頭髮就淺色,澤眉毛又密又深,
一露眉就奇怪到不得了!
抱著好奇心態就試下呢支眉毛膏啦!

佢個刷頭大小適中,
沾膏量唔會過多過少!
獨特刷頭一邊長一邊短，
長果邊主要針對眉頭等濃密位置,
而短果邊可用於眉尾比較疏嘅位置!
而且顏色都幾出,真係染得淺條眉!
好似出去染眉嘅顏色，仲好自然添!
 

大家可以睇下我嘅Before After啦!
我條眉真係幾深色嫁!

淨係用左染眉膏染淺效果都幾soft幾自然!
而且唔會一舊舊同乾!
同埋真係唔甩色嫁!
平!靚!正!大家都可以試下!

Karen推介：

防敏水溶性維E乳霜 ＄48

成日都皮膚超乾，尤其是沖完熱水涼皮膚更加容易乾燥，
所以一定要搽body lotion，
如果唔係皮膚就會乾燥到好痕，
見到呢個cream咁大size都只係$48，
諗住買嚟試下都無妨。
佢可用作身體潤膚霜滋潤皮膚，
亦可作為沐浴露，只要將乳霜塗勻全身，再用水沖洗，
之後可以唔使再搽補濕產品。
配方加入維他命E，有效對抗自由基造成嘅衰老現象，
適合任何年齡人士，懷孕同哺乳期間都適用。

cream狀質地塗勻後好易吸收，
好似表面有層膜，鎖住裡面嘅水份咁，
訓覺前搽可以keep到成晚， 皮膚唔會再因為乾而痕癢。
價錢仲咁平，好抵用！

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup