最近天氣經常都唔穩定，
早幾日放假見到難得無落雨, 太陽咁好，
我就趁機親親大自然啦！

我地平時介紹美容護膚嘅資訊就多啦，
比較少講有關 Lifestyle 嘅嘢。
平時係網站上見到人問到點樣減肥, 有咩減肥藥係有效，
搽瘦身產品可能可以令肌肉更加緊緻，
但真係想減肥嘅話就要靠做運動啦！

大家可能好怕做運動，其實做運動都可以係一個享受嚟架！
今次想介紹個唔錯嘅地方比大家放假踩單車去玩下∼
沿路有好多風景, 小動物睇之外，
仲有個出名食豆腐花嘅好地方介紹！

呢個地方位於新界上水嘅河上鄉，
為咗唔係住係新界呢附近嘅朋友都知道點去，
我會由上水火車站為起點教大家點樣踩單車去！

首先係上水火車站 A2出口出閘
再向右邊沿彩園路行到見到行人天橋
過馬路就會見到「彩蒲苑」

沿住入口呢條路直接踩..
好快就會見到呢個路口，

去到呢度左右兩邊都有隧道，
我地就要轉右邊隧道！

1. 轉右落斜再穿過隧道
2. 一出隧道轉右上斜
3. 轉入村就會見到大頭嶺村村公所
4. 沿住呢條路直去就岩啦!

距離三十米左右就會去到我上面呢個相嘅位置，
跟住上圖箭咀方向去

就開始一路都會見到好靚嘅風景！
沿住呢條路直去就會見到石上河，

等我貼下沿住石上河見到嘅風景相啦！

呢度除咗風景靚之外，
仲有好多動物可以影到…

黃昏嘅時候都好靚架!

沿住石上河一路踩單車會去到呢個位置，

1. 沿住呢條路上橋
2. 過咗橋之後再轉左
不過踩到頭先條橋記得向左邊望, 因為景色好靚架!
下面呢張相就係望到嘅雙魚河啦!

沿住雙魚河呢條路踩單車落去，

就會愈嚟愈接近我想介紹嘅食豆腐花好地方啦！
呢條路嘅風景都好靚架！

過咗二百米左右就會見到左邊有條橋！

呢個時候唔洗再直去啦。
轉向右邊落斜，左邊就係我想介紹嘅「豆美味豆花團」
踩單車嚟嘅話平常人應該用20分鐘左右，
因為我踩得比較快，10至15分鐘都踩到了。
如果中途睇風景同影相就要預多DD時間啦!

$12 就可以任食豆腐花, 黑芝麻豆腐花同埋任飲低糖凍豆漿!
薑汁糖漿、黃糖自己落！

平時同班朋友踩單車嚟，
順面去呢度食下豆腐花傾下計就真係好舒服!

佢地嘅豆腐花豆味好重好滑！
兩款豆腐花味道食得出糖份加得唔多！

另外，因為$12 任食嘅豆腐花係提供暖嘅豆腐花，
如果大家想凍Ｄ可以同佢講豆腐花加低糖凍豆漿！

佢地平時開 10am – 6pm。
所以想去嘅話唔好太晏去啦!

如果大家食完豆腐花想再影下相先走，
呢附近景色都好靚架！

附近仲經常有人放牛同騎馬，
呢次我撞唔到騎馬，影唔到相，但就見到放牛啦！

唔知大家嚟緊放假撞岩天氣好，
又會點樣安排節目呢？

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup