相信最近天氣又焗又熱，間唔中仲打風落雨，
搞到大家都只好留係屋企度真係好悶。
其實留係屋企都唔一定會好悶嘅，
大家留係屋企整下甜品都可以好開心架！

今次我就會教大家整椰汁糕！
首先,我地需要以下材料：

鮮奶 1L  x 兩盒
快達牌椰汁 大小各一
砂糖 450g 左右
魚膠粉 一盒
另外需要兩碗清水(普通飯碗容量)

***點解會用快達牌椰汁呢? 其他牌子又可唔可以?
其實我選擇用快達牌嘅椰汁純粹係因為佢嘅份量,
一罐大一罐細就剛剛好, 唔需要另外再量。***

*** 可能又有d朋友會問, 鮮奶可唔可以買低脂又或者脫脂架?
其實我建議用返普通鮮奶, 因為脂肪比例有唔同嘅話,
可能會令椰汁糕嘅凝固效果有差別架! ***

準備好材料之後, 我地就要準備一個碗將包砂糖同魚膠粉混合

 ***大家要記住個碗唔可以有水, 要好乾爽架!
如果個碗有水嘅話, 一旦魚膠粉接觸到水份就會變到’一舊舊’,
咁就影響到我地將佢混合砂糖呢個步驟架喇!***

混合咗d砂糖同魚膠粉之後我地就可以拎個煲,

1. 先煲熱兩碗水, 水滾之後隨即轉細個火

2. 再加上剛才混合嘅砂糖同魚膠粉慢慢煮溶
***唔可以用太猛嘅火煮溶d魚膠粉,
水滾之後等d水熱熱地就開始慢慢倒d魚膠粉同砂糖落水,
火太猛會煮燶架! ***

3. 當砂糖同魚膠粉完全溶入水之後,
就可以放低佢攤凍少少(大約15至20分鐘)
再倒去一個大碗度

4. 再加上椰汁同鮮奶慢慢攪拌至各種材料融合
椰汁需要用晒大細各一罐嘅份量,
***鮮奶就只需要倒一盒加 2/3盒 嘅1L 裝鮮奶就可以喇!***

***如果想D椰汁糕可以凝固得快D可以係呢個步驟加上冰,
咁就可以快少少凝固, 快D有得食架喇!***

之後就咁雪入雪櫃就食得? 當然唔係喇!
呢個時候我地需要準備一個篩,
將佢地倒落容器內嘅時候我地用篩隔住嚟倒,
為免有未完全溶晒嘅魚膠粉留係椰汁糕內, 影響口感。
倒晒落容器度就可以放入雪櫃等幾個鐘凝固後就可以食架喇!

上面嘅份量整到最少15人份量左右,
材料價錢方面都係$100內,
所以都幾岩整嚟一家人食又或者招呼一班朋友食!

如果大家想整比小朋友食嘅話,
仲可以選擇倒落下面呢類布丁容器!

食嘅時候慢慢將佢倒落碟就會有個好靚嘅布丁形狀架喇!

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup

（版權所有，未經同意不得轉載。)