冬天就快嚟喇，最近天氣都變得乾燥咗，
唔知大家有無留意自己嘅髮質開始有毛躁嘅問題呢？

頭髮出現毛躁問題真係好令人困擾，一來外觀上無咁好睇，
二來頭髮太乾太毛躁，冷天就經常出現靜電問題，
有靜電，頭髮就會梳極都唔順滑唔貼服。

除咗天氣問題會影響我地嘅頭髮狀況，
其實平時我地係使用電熱髮器會令我地嘅頭髮變得毛躁。
想改善毛躁問題，我地就要好好修護我地嘅頭髮喇！

今次我地會為大家介紹一ｄ可以修護頭髮嘅護髮產品，
當中除咗有需要沖水嘅產品，仲有幾款唔需要沖水，
岩晒平日生活較為忙碌，需要方便ｄ嘅朋友！

首先先介紹兩款需要沖水嘅護髮產品

AQUAIR 鎖水保濕護髮霜
成分方面有水潤膠原成份，毛鱗片修護成分同埋氨基酸，
水潤膠原成份配合氨基酸，有保濕導入嘅效果，令保濕效果可以直至髮芯。
而毛鱗片修護成分，可針對染燙受損毛鱗片部分，填補表層空洞，
令頭髮更有韌性同埋有順滑嘅效果。

香味方面比較得意，雖然佢介紹係清香嘅花香味，
但我聞落反而覺得有Ｄ似平時軟糖嘅味道。

SHISEIDO 凝護髮素

SHISEIDO 呢個系列用咗獨創嘅「模仿水份技術」,
可以針對導致髮絲乾旱主因，改善頭髮乾旱問題，
而且仲可以由內而外發揮深層補濕同鎖水嘅作用。

另外,可以修復受損嘅髮質同埋令頭髮更加水潤同有光澤！
好適合頭髮乾旱、因染燙令髮絲受損嘅朋友！
香味方面，係清新嘅草本植物香味！

上面同大家介紹咗兩款需要沖水嘅修護頭髮產品，
接住落嚟就會同大家介紹幾款唔需要沖洗嘅產品。

L’OCCITANE Rose et Reines Hair Mist   (HK$190/ 100ml)

呢支護髮噴霧質地好水，完全唔會令人感覺好杰同好笠。
佢入面加入咗嘅玫瑰花水，有好好嘅滋潤效果。
入面仲配有格拉斯，保加利亞，摩洛哥，土耳其同埋普羅旺斯嘅玫瑰精華，
令呢支Hair Mist 帶有果味之餘仲有少少清淡嘅玫瑰花味。
而佢除咗可以滋潤頭髮，仲有少少定型嘅作用，令頭髮更加容易造型。

噴完之後用手輕輕梳整齊頭髮，有即時改善唔貼服嘅問題，
質地好清爽完全唔笠身，仲有少少改善本身頭改打結嘅問題。
平時噴完之後唔需要再沖洗，好岩平日趕出門口又怕整到對手痴笠笠嘅朋友！

kms TAMEFRIZZ de-frizz oil

佢係一支針對頭髮毛燥問題嘅 oil，
雖然係oil, 但係佢嘅質地完全唔笠，
搽上頭髮感覺佢質地好輕盈, 好滑, 好跣手，
好快就被頭髮絲吸收。
搽嘅時候聞到佢嘅香味有少少似杏仁味。

佢有即時改善頭髮毛躁問題之外，
更有抗潮濕同埋抗熱嘅功能。
搽完之後頭髮明顯摸落滑咗同埋順直貼服咗。

好適合平時用得多電熱髮器同埋頭髮出現毛躁嘅朋友。

AQUAIR 水分 Hair Pack <免沖水>

入面有鎖養型導水因子，可以密集補修受損嘅頭髮，
而入面嘅另一成份奈米精華就可以迅速滲入髮芯空隙，
有即時順滑頭髮嘅效果。

搽完之後感覺質地清爽唔笠，搽完之後可以令頭髮更有光澤，
佢清淡嘅花香味仲可以阻隔平日外出周圍嘅煙味又或者難聞嘅氣味。

使用嘅時候頭髮唔需要完全乾躁，
大家係洗髮後先用毛巾輕輕拭乾水分，
再搽上頭髮（搽係髮尾同埋受損頭髮嘅位置）。
如果夜晚訓教前用效果會更好!

TSUBAKI Hair Oil  （HK$112/ 60ml）

TSUBAKI 今次推出嘅HAIR OIL 極上美髮油，同過往一樣用咗山茶花油，
但今次推出嘅Hair Oil 仲加入咗大豆卵磷脂同埋滲透美艷精華，
呢兩種成分令美髮油更迅速滲透入髮芯，質感清爽不黏膩，
令頭髮更有光澤之後，更有保護、保濕同修復嘅效果。

用時只需要滴 2-3 滴落掌心再推勻 (因應長度和髮量調節)，
以受損髮尾為中心，塗勻髮絲。

用嘅時候聞到好大陣好香嘅花味，
搽完之後感覺頭髮嘅毛躁同乾旱問題大大改善咗。

髮油好多時候只係搽係髮尾又或者受損髮絲位置，
咁以下落嚟就會介紹兩支搽係頭髮上面之外，
仲可以搽係頭皮位置嘅精華油。

PHILIP B 頭髮調理精華油   (HK$270/ 60ml)

佢採用嘅精純草本, 果仁同埋鮮花精華油成份濃度好高，
作用係由內至外平衡, 紓緩, 修護同埋修復髮絲。
好適合成日燙染頭髮，令頭髮受損，出現乾旱同失去光澤嘅朋友。
另外，佢嘅成分可以為頭皮提供足夠養分，
搽係頭皮位置可以促進頭髮生長同埋減少銀髮或者白髮嘅形成。

佢嘅質地好輕盈，好透薄，搽完佢之後好容易就被頭髮吸收，
而且用完唔會有痴笠笠嘅感覺。

不過，佢嘅時候一定要係乾爽嘅頭髮上面用，唔可以係濕髮上面使用。
用嘅時候滴幾滴頭髮落頭髮，然後等佢循髮絲順流到髮尾，
直到全部頭髮被精油覆蓋。
再由髮根到髮尾慢慢擠出頭髮調理精華油，就會感覺頭髮變得順滑。

AVEDA Shampure Composition 純香綜合滋潤油   (HK$300/ 50ml)

佢入面有 25 種純淨花卉同埋植物精華，再經複合配方調配而成，
當中包括源自保加利亞嘅有機認證薰衣草,
馬達加斯加嘅有機依蘭依蘭同埋有機向日葵油等等，
佢地嘅作用就係深層滋潤頭髮同埋鎖緊水分。

佢嘅香味聞落好舒服，用嘅時候感覺自己好似做緊 Spa咁!
使用佢時可以係洗髮前滴幾滴係手心，再輕輕地按摩頭皮，有修護頭皮嘅效果。
除咗可以用係頭髮上面，佢亦可以係沐浴後搽係皮膚上面，
有唔錯嘅滋潤效果。

今次為大家介紹係咁多喇，希望下次可以再同大家介紹其他產品喇！

欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup