前幾日係入冬之後溫度最低嘅日子，凍到騰騰震，
尤其屋企係新界地區，真係完全feel到“新界再低兩、三度”嘅威力。
我係超怕凍嘅人，冬天長期手腳冰冷，
所以我都搵盡辦法嚟對抗寒冬架∼

1. 電熱氈

我覺得呢樣真係非常偉大嘅發明！比暖風機更好。
而家冬天冇咗佢係瞓唔著覺，
相信好多女仔都好似我咁手凍腳凍，
就算著住毛毛拖鞋，除咗鞋唔夠5分鐘就開始凍番，
著住對襪瞓都係無補於事，
明明全身蓋住被，對腳都仍然keep住凍，
搞到成晚失眠，超痛苦!
而家有電熱氈就成個被窩都好溫暖，
舒服到第二朝起身非常掙扎。

2. 飲薑茶

特別喜歡黑糖薑茶，而家好方便，有啲pack好晒，
一磚磚沖嚟飲就得，唔使慢慢批薑片咁麻煩，飲完暖笠笠∼
仲可以舒緩鼻敏感添。

3. 暖水袋

雖然而家好多暖蛋、暖包、暖貼可以取代，
但係呢個暖水袋我都有用緊，因為太得意喇，
坐喺梳化睇電視拎住佢，蓋埋被就perfect。
唔用嘅時候又可以擺喺度裝飾。

4. 保暖衣物

Heat Tech保暖內衣不能少，仲有頸巾，
老人家話有頸巾護住喉嚨同頸背，先唔會入風冷病呀。
戴埋冷帽遮住對耳仔就唔會凍親啦。
另外，好凍嘅時候就會搵番毛毛鞋出嚟著，真係暖好多架。

5. 臨瞓前足浴

我係好鍾意用好熱嘅水沖涼，
但其實對皮膚唔係咁好，搞到又痕又乾，
所以要改下浸足浴喇。
臨瞓前浸一浸，可以驅寒，促進血液循環，
有舒緩作用，好瞓啲架。

6. XBOX 360 Kinect

人地話手腳凍係血液循環唔好，著幾多衫都唔夠，
始終都要郁動下先會有改善，
所以喺屋企做運動都係唔錯嘅方法。
人地話跳鄭多燕可以出好多汗，
但係我就覺得好似有啲悶，所以就打機當運動喇∼
唔好以為玩就唔辛苦呀，認真玩真係熱到出汗呀。
首選跳舞、網球、排球，運動量極高!（對平時少運動嘅人嚟講）。
同埋天氣凍嘅時候，習慣性地縮埋一舊，
搞到頸同膊頭緊晒，做運動就可以拉下筋，順便鬆鬆。

如欲取得更多第一手美容及扮靚資訊
可瀏覽Girls Talk Main Blog：
Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)