Janice Lam (Makeup Artist)
janicelam
暱稱: Janice Lam
性別: 女
國家: 香港
« July 2017 »
SMTWTFS
1
2345678
9101112131415
16171819202122
23242526272829
3031
最新文章
新手化妝師入行小tips
10個上妝Do’s & Don...
來∼看看今年流行過的...
[ Fashion Gossip ] 今...
熟齡護膚品試用
文章分類
全部 (681)
每月文章
訪客留言
小蠻全台純兼... (xde258)
謝謝分享 (mfb1234)
最近訪客
最近沒有訪客
日誌統計
文章總數: 681
留言總數: 35
今日人氣: 41
累積人氣: 172986
RSS 訂閱
RSS Feed
我的化妝師生涯(3)
2015 年 2 月 26 日  星期四

FotorCreated

之前我講到自己好忙好多野做,
不過無咩人天生鍾意淨係工作,
我自己有時都想懶下,可以休息下。
化妝呢個行業好得意,就係freelance形式,
所以我成日都話好天收埋落雨柴。
無野做都會好驚架,因為會無收入,
又會諗係咪客人唔滿意你既服務,
到有野做時,又會忙到死。

以前我自己都會有咩job都接,盡量唔會推job,
因為心理上覺得推得多怕客人唔再搵我,
就算開左化妝學校,都試過連續2,3年夜晚教班上晝出job,
其實都好辛苦,有時返工可能要超過十幾個鐘!
長時間咁樣返工,身體由上年開始都無咁捱得,
所以editorial既job我都開始少接左。

DSC_4764

如果你問我教班辛唔辛苦,
我就覺得最緊要學生聽話、勤力、肯學、用心,
遇到學生成日唔記得野,或者講完又唔知我講咩,
其實我都唔介意講多幾次,
不過如果係無心裝載,都會幾勞氣,
因為我自己對化妝好認真。
唔少同學仔都會覺得我好惡、好嚴、睇得好緊,
但係我自己覺得咁樣會好啲,
因為出到去就無人會提點你,
同埋人地無必要花時間晒口水去教你,
好多化妝師都話唔使咁樣去教,
我亦都聽到其他同學仔講返出面學化妝既事,
唔會咁多over time時間、咁嚴格、咁仔細 等等,
但呢樣係我最基本既要求。

fb-class1

其實我自己都會驚教得唔好,
如果教得唔好,客人都會問返你喺邊度學。
所以我成日都同學生講,
如果無信心化妝或者化到一個靚妝,
就唔好太心急出去接job幫人化妝,
因為化妝係靠自己口碑,
應該到自己有信心幫陌生客人化妝先。
如果佢地覺得你ok,就會再介紹其他客人比你,
之後再慢慢去接job去嘗試會更好。

同學仔都會知道我上basic班或者新娘班時,
都會叫埋model一齊講下個妝有咩問題,
雖然未必個個model都識睇或知道問題所在,
又或是同你好friend而唔敢講你知,
不過呢個時候都應該認真去講、去睇,
因為出到去客人一句唔ok就真係唔會再搵你,
仲可能會叫身邊朋友都唔搵你架,
所以我都希望同學仔可以做到最好,唔怕我長氣同嚴格。
我自己都幾鍾意教化妝呢個工作既。

FotorCreated9

4545

上次都有提到我自己就鍾意creative/ editorial妝,
見到自己化妝既大頭相喺一啲公開平台show出黎,個滿足感會好大,
所以我自己都會捉得好緊,希望做到最好,
之前我學化妝時,都無諗做邊個類型既化妝師,
總之化到靚妝、有人鍾意就已經好開心。
宜家見到好多學生會揀、會諗,
只係做新娘化妝、又或者只係想化media妝,
搵到錢就ok,唔需要出名等等,
其實全部都係化妝skills既問題,
因為我自己都好鍾意化beauty/ 化妝品牌既妝,
化呢類妝可以好好鍛鍊自己技巧,
大家喺書見到既妝容,係放到好大、好仔細,
當有某一part做得唔好,
好似係眼線唔夠貼、睫毛夾得唔夠靚、
搽得唔夠好、用色落既位置唔岩,
呢度就會睇到自己功力,
所以我自己既路向係做一個全能既化妝師。
一來可以多啲choices,可以揀做media/ 廣告 /beauty等,
如果淨係做新娘就會局限左自己,況且宜家既競爭都好大,
所以我都會叫同學仔嘗試多啲唔同方面,對將來出路都比較好。

FotorCreated8

DSC_2564 拷貝

不過我自己就有一樣野無諗過要做,就係做artist既化妝師。
因為我自己學化妝時既夢想都係做一個出名既化妝師,
如果聽到「呀,你係幫邊個大明星既化妝師!」,
感覺好似唔係靠自力實力咁。
當然好多幫artist化妝既都化得好好,
但我自己會係想人地聽到我個名就知我係一個化得好好既人,
咁樣對我黎講滿足感都會大啲。
但係相對黎講呢條路就會比較遠少少,
做化妝既都知,出去做野時都會有人問「丫,你幫邊個化開妝架?」
初時做野都會聽到「你都唔係幫邊個明星化,你都唔係好出名啫!」
我自己都好想打破呢樣野,唔使靠人地個名出名,
so far 到宜家自己都慢慢做到,咁所以滿足感都好大。
以前化artist我都有做過既,不過要用好多時間、好唔定時,
變左無時間去做自己鍾意既creative妝,
所以相比之下,興趣個動力大好多。

FotorCreated23 (2)

細細個岩岩化妝既時候就梗係雄心壯志,
同現時學緊化妝既同學既心態/諗法其實係一樣,
我記得有次同朋友去泰國旅行,
去到一間主題房既餐廳,可以大聲講野唔會有人聽到,
我地就係度大聲講自己既夢想,
咁當年就有好hit既戲,就係sammi套《嫁個有錢人》,
其他朋友都不約而同咁講呢樣係自己夢想,
但我自己就希望係成為一個出名既化妝師!
幸好中間捱左幾年之後開始有人欣賞,慢慢接job,
其實大家如果都有睇開我之前既sharing,
我都係想帶一個message比大家:
如果自己本身條件未必可以順利地去做到一樣野成功,
都唔可以打定輸數,覺得自己唔ok,
呢個時候要問自己付出左幾大決心同幾多努力,
如果已經做好左決心同付出左努力,其實已經成功左一半,
而另外一半當然係天時地利人和啦。

FotorCreated12

如果大家想睇返我一啲舊作品或者之前既sharing,
可以click入以下連結:我的化妝師生涯 / 我的化妝師生涯(2)

line376

JaniceLam jlm

如欲取得更多第一手美容及扮靚資訊
可瀏覽Girls Talk Main Blog: Girlstalk Blog
或 Like我們的Facebook專頁:
Janice Lam Makeup Workshop Facebook

分類: 未分類
發表時間:2015-02-26 02:29 PM  [ 編輯日誌 ] [ 分享至FACEBOOK ]





訪客留言 (返回 janicelam 的日誌)