"好嬲你收埋自己.... 好想知你情況.... 好嬲你自暴自棄...."
無錯, 我係收埋自己, 我唔想見到任何朋友, 唔想同任何人再講而家的情況, 點解?? 因為講都無用, 你地根本唔會想像到我而家要面對十萬樣野, 你地最多係想像到我要成日去醫院探我爸, 你地唔會諗得到其實係每日要去老人院探佢; 你地唔會體會到我見到佢情況時個心有幾痛; 你地唔會體會到我要吞聲忍氣咁面對東區醫院態度惡劣的醫生, 護士同社工; 你地唔會體會到嗰時d仆街醫生護士社工日日問我搵到地方未, 問我幾時肯俾佢出院, 仲要叫我地著緊d, 唔好賴死... 你地唔會感受到我地傷痛之餘仲要連僅有的尊嚴都被踐踏嗰種滋味; 你地一定諗唔到我耍周圍仆去追討賠償, 搵老人院, 搵中醫, 搵長背椅; 你地唔會諗到我每個星期六早上周圍仆去同佢申請呢樣申請嗰樣; 仲有成日要同親戚朋友交待爸的情況, 不停咁將一d我唔想聽到的醫生說話重覆又重覆咁講... 所有所有野都係我一個人做, 只有我support我媽, 有d人可以置身事外, 咩都唔理, 你地唔會諗到嗰種壓力, 憤怒幾咁大...
我唔主動講, 因為講都無用, 我唔想朋友打黎問我呢排點時, 我要扮無野, 同你地有講有笑, 令你地覺得我心情好左, 令你地安心d...我唔想做呢d野, 我唔要為人地諗, 我係好唔開心, 我唔想俾到人錯覺我無事, 我係有事, 我唔想掩飾, 試問發生响你地身上你地會點?? 不過算, 都係我唔好彩, 只會發生响我身上....
自暴自棄...我絕對唔係自暴自棄, 我盡左一切能力做所有野, 自暴自棄就會咩都唔做, 但我心靈上絕對有自暴自棄的權利, 試問上天一次又一次咁玩你, 要你面對一d你無能力去改變的事, 仲要一次比一次惡劣, 你會有咩感覺? 我而家唔係自暴自棄, 我只係憤怒, 我好嬲好嬲上天點解要咁對我, 但同時我又要去求上天幫助我, 成日都話上天自有佢嘅安排, 但我絕對唔覺得個安排有任何好處...只係為我帶來無窮無盡的痛苦!!! 上天最厲害之處, 就係覺得上次要我面對死亡仲未夠殘忍, 今次俾d仲殘忍的事我去面對, 我終於知咩叫比死更難受!! 多謝你!!!!!! 我成日諗, 點解世上咁多壞人, 但點解遭遇不測的永遠係好人?? 算啦, 呢個世界所有事都係唔公平的, 要求多多, 不懂滿足的人可以得到更多, 但容易滿足, 懂得珍惜一切的人則會被取走身邊僅有的一切. 即使我而家十萬樣野要我去做, 心情有幾咁壞, 但上天一樣要我病, 令到我把聲沙哂, 而家重要睇埋皮膚專科... 平時無事發生時就無幾可病, 而家咁樣就幾十樣野衝埋黎, 仲要係我差幾日先過probation, 令到我無得休息, 無medical... 好似一切都玩梗我咁...
|