今日好早就起左身，發覺昨日喉嚨只係有小小沙已經變左喉嚨痛喇......於是我坐起身，下床，去櫃到睇下有藥可以臨時治療，搵下搵下，我見到「樂信感冒靈」同「幸福傷風素快2倍」呢兩盒感冒藥，我揀左第2個隻，倒左杯暖水，然後去食藥。搞掂再番上床休息一陣。訓到9.20分，老豆拍門叫我同家姐起身番教會，我今次又好似以前咁假裝睡覺，然後等佢叫我個陣郁一郁，咁佢自然就會去叫家姐。
所有野都ok後，就出門口。o係行去火車站ge途中，我感覺到有d野o係我隻手到，我立即舉手，見到一隻唔知係咩ge昆蟲，呀!理得佢係咩蟲，總之整走左佢先啦!!!呼~~鬆一口氣.....入閘之後再落電梯，嘩!!加速!!!好在趕得到火車，o岩o岩好搭到。
到左沙田，我地三個急急腳行，因為遲左出門口，所以咪行快d去食早餐囉。我叫左雞扒配腸仔和一杯檸檬茶，唯一唔同ge係:「今次杯檸檬茶係熱的!」冇辦法啦，喉嚨痛唔飲得凍野。
聚會開始左，唔係點唱到詩歌，但係都有唱，呀!!!個喉嚨好似火燒咁，好乾呀!
聚會完左之後，我地三個去行西田，買左1枝鮮榨西瓜汁，2枝雞骨草和3枝C•C Lemon。然後去個foot court食午餐，我個個配菜:蜜汁豬頸肉好好食!^^
番到屋企，換左件衫，做埋視藝d功課，然後去沖涼。沖完個涼全身鬆晒，舒服晒。趁食晚飯之前ge空擋，我拎番上學期本數學書出黎溫書，我想將全部數都重新再計一次，冇辦法，20號考試，之前個2次又懶，個名次不停跌，我自已都睇唔過眼，所以而家努力溫書。做左一陣，就放低筆休息一陣，阿媽就話:「每次考試之前你一定會病，真係唔知點解?」其實我心入面係咁諗:冇錯，仲係每次當我真係用功去溫書ge時候就真係會病.....=0=我都唔知咩事，仲係次次都係喉嚨痛!!
終於到左dinner，今晚d飯菜好似為我而設一樣，全部都係軟身，係粉絲蒸蛋和豆腐野菌肉粒，好好吃，^^
食完飯，睇左陣足球，荷蘭已經入左1球，真係好想睇，不過病人一定要早d休息，更何況我明日仲要上學，要早d訓。
好啦，講住咁多先，明天再見，拜拜~~
每日心語:~*唔知今日ge飯菜係咪為我而設呢?*~
|
