之前咪有篇日記話同美楠去左探路既，今次係入camp la。因為之前果日去完書展，累到傻左，最後攪到遲到......仲要係約係我樓下，要兩個女仔等我都唔知幾唔好意思。我地3個去西貢先，美楠就同另一個女仔買完野先去西貢join我地。屯門去西貢，一個東一個西，拉直線都百幾km la，坐車坐到暈......

到左西貢就食lunch先，等埋美楠佢地黎買埋d野就飛的去西灣亭，之後就行山入營地，我鐵人般既生活開始la......

講下條路先，算係一條唔錯既路，比青山好行(其實青山係唔易行的...)，一個正常人(男or女)都可以應付到，如果好似我同美楠呢d做開運動既就更加冇問題，不過係講緊無負重既情況下，睇埋落去就知ga la......

睇我頭先打既野都知得我一個男人la，所以重野係晒我身上，我估計我個袋有50k重，再拎多兩袋野，總共60k左右la，一路行入去，行到半路我開始失去意識，不過唔係中暑，只係我自己將所有精神集中晒係d肌肉度，個腦冇諗其他野......

行左9個字終於都到(我冇負重既話只係行半個鐘)，我個腦有番意識之後第一個諗法就係︰我已經透支左3日既體力la，我訓3日之後叫我出camp la......不過世事冇咁完美，扎完營去煮飯，好彩有間士多肯被我地借地方煮，如果唔係就要係沙灘煮。食完番過去營地，佢地4個去番士多沖涼，我就留低睇野。

等到佢地番黎，美楠發現佢個營地則邊有個洞，因為擔心係蛇洞，我同佢同另一個朋友一齊係個沙灘度行黎行去搵黎搵去，好似上緊一堂野外生物mix偵探學堂咁......搵搵下仲見到有隻死狗係度，真係死狗一條，一條狗既死屍!!!!!!我都係第一次見，好惡心，好彩我見慣d核特野姐，佢兩個女仔就睇多眼都唔敢(正常的，我才是不正常=.=)。最後終於肯定左果個係個蟹洞，有驚無險，不過呢晚都刺激，果種氣氛令人興奮(我咋)。不過夜晚入左營之後就麻煩la，我發覺有好多野咬我，成晚訓唔到，5點左右被美楠叫醒左睇日出，都幾靚，睇住個鹹蛋黃升上黎，再睇住佢變做烈日......

之後我就係個天幕下面訓左，一路聽住佢地4個女仔傾計同玩，不過佢地冇叫我起身食早餐，可能怕我累la。我訓醒已經10點幾，又去左士多煮lunch，食完坐左陣，佢地仲有兩個fd入緊黎，知道佢地行緊山路入黎，我地就出去幫一幫佢地，我同美楠同一個女仔出左去，另外兩個係度等。番到黎就係度hea。

5點幾突然雷聲大作，就好似即刻會落大雨咁，士多老板娘想我地幫手搬一搬d貨，因為佢地用水路送左d貨黎，驚會落雨。係沙灘搬上黎，一petpet氣水咁搬，仲有米同炭，氣水我就唔知搬左幾多la，米我自己搬左3包，應該係20k的，炭我就自己搬左2包，同人一齊搬左一包，應該係30k的......搬到死死下......搬到半路我叫美楠佢地番營地睇睇先，我繼續幫手。你地可能覺得我好傻，算la，幫得手就幫到尾la。

之後我番去營地，佢地已經拆晒營，因為驚會落雨，之後就執晒d野去士多，考慮緊今晚點，諗諗下唔知點解行晒出沙灘，我落水玩左陣，佢地多數係沙灘玩，因為佢地冇帶泳衣。玩完仲走左去捉蟹，原來d女仔都可以幾殘忍，兩隻蟹都被佢地玩到死左......

之後我地決定起番d營，因為行完雷一滴雨都冇落，再望望個天，可以肯定兩個鐘內唔會有雨=.=(人地雷聲大雨點少，佢雨都冇滴......)不過我冇起我自己果個，因為我諗緊d野......

之後佢地番黎就煮晚餐，呢餐好豐富下，因為我地決定第日早d走，今餐食埋第日lunch d野。可能佢地知我累la，都冇叫我做野，睇住佢地煮，食埋都冇叫我洗野，對我真係好~~之後就番去訓la(佢地係煮飯中途已經逐個去左沖涼)，我之前話諗野就係我都仲係怕會落雨，所以我決定左係外面訓，冇起營，照舊被野咬到訓唔到，我諗我臨到天光先訓著，因為我有番意識果陣已經被個大太陽曬到應一應......雖然最後都冇落雨，不過我一路係沙灘訓一路都見到閃電，

之後我地就拆營去士多，煮埋個早餐(午餐!?)，食完都成12點幾，最後又攪到成1點半先起程走。我揹番自己個袋同拎多個營，行到條大斜路見到有個女仔唔係好掂，幫佢拎埋個營，咁我身上就有一個袋3個營la(我個袋上面都有一個=.=)，一路行出去，我用晒我全身咁多組肌肉咁滯，腳就唔在講la，手抱兩個營用手力，肩膀位要揹野就一定la，最後估唔到仲用埋個low-back，彎低腰用埋腰力頂住成個袋既重量......總知可以用既肌肉都被我用晒ga la......最後當然仲要好似入黎果陣咁集中意志係肌肉度la......出到去個亭見到架的士好似見到天使一樣囉~~(佢地call既)

之後就番西貢再番新蒲崗再番屯門，終於番到屋企，沖完涼第一時間番入房，開冷氣、開電腦聽歌、開note-book上網，享受番一下文明帶被人既好處先~~不過享受唔到一陣我就呼呼大睡lu~~不過呢d都係享受黎既~~