亞洲星光大道、超級巨聲，邊個節目好睇啲?

呢兩個節目都有同一個性質，都係歌唱比賽，兩者一樣有評判，每集一樣會有人出局等等，不過唯一有唔同既係，比賽模式就係分別由台灣同西方國家引入。喺參賽者方面，我自己就發現到超級巨聲既大部分參賽者都好後生，睇親都係10幾歲既參賽者喺度唱歌。喺評判方面，就發現超級巨聲多數都係由歌手擔任評判，連主持人同嘉賓主持本身都係歌手；亞洲星光大道既評判就各有不同，但就以音樂人為主，而星光大道本身亦規定要有時裝設計師評衣著

我覺得兩個節目既參賽者質素非常之高，但我個人就覺得亞洲星光大道比較好睇。

我諗最主要原因就係評判，我發覺超級巨聲好多評判都好唔掂，尤其係梁漢文，人講乜佢又講乜，完全無自己意見。

 而且，我覺得要搵D唱得之人或者識得欣賞音樂既人做評判，肥媽已經係樂壇前輩有經驗、周國豐做左咁多年DJ就識得聽人地唱歌、吳國敬自己本身都係教人唱歌既、劉以達又係音樂人，所以評出黎既分、講出黎既意見起碼都對參賽者黎講係受用；但係超級巨聲就偏要搵歌手做評判，歌手唱歌都係有「老師」教的，點解唔請「老師」黎評? 嗰啲「老師」就好似我見到有音樂人伍樂城都有做評判，但我相信參賽者都只係想聽音樂人、老師級既評判既意見都多過聽歌手既意見囉。

再其次就係節目本身，超級巨聲既第一集原來仲未正式開始比賽，完全唔知喺度做乜，播哂事前既初選淘汰片段，我覺得每個節目既第一集係非常重要，但係第一集已經令我自己無乜意慾再睇落去。好彩亞洲星光大道令我有另一個選擇。

不過，多得慣性收視，大部分香港人喺呢下半年會繼續為超級巨聲捧場，播放初期幾令觀眾不滿都好，相信觀眾日後都會慢慢接受，香港人就係咁，因為無綫，所以就算無綫做既節目質素平平諸多批評，都要睇落去。不過，我見到無綫亦開始為超級巨聲而改變，開始搵啲有卡士既人做評判，節目開始變得緊湊等等，而本身歌唱節目後期既比賽情況會更加激烈，相信日後兩台既歌唱比賽會更加好睇

此日記4 BLOG同步