我讀文理5G班, 文商班
當初文理收左我既時候我成日都以為我都會讀文科班
因為我會考放榜當日係咁同文理啲老師講我係讀文科
點知暑假有一日打去學校問修讀科目既問題
副校長同我講我係讀文商班, 因為文科班無位
而9月開學之後得知, 文商班係F.5最差嗰班
人數亦都係最少, 得25個, 不過其實人少少反而幾好
我喺度好想多謝文理, 咁既分數都收我, 我會珍惜

_________________________________________________

9月1日

我同其他中小學生一樣都要開學
但我同其他中小學學生唔同既就係 我係重讀
新環境 新模式 新老師 新同學
我揀左呢條路就係要咁行，遇左全部事情都要重新適應
第一日番到呢間學校, 門口有幾個學生同我探熱
跟著睇下5G班應該去邊間課室
跟著上去5樓, 睇到好多金句貼左喺樓梯既周圍
入到班房, 第一眼就見到無著燈
之後再睇, 只係見到兩/三個同學喺度吹水
我求其搵個位坐, 坐左喺課室左上角角落位
發現呢班房少左好多位, 搞到課室既後面好空
原來, 我地5G班總共只係得25人
趁未打鐘, 出班房周圍行去適應新環境
再番番班房, 已經齊人, 等一陣, 班主任就入黎
5G班有3個重讀生, 班主任少不免都要提下, 但無詳細介紹
處理班務之後, 班主任送左以下幾樣野比5G全部學生
而呢幾樣野背後亦都有意義

計數機---計算自己距離會考既日子, 要把握時間
塗改液---知錯能改
膠布---可能會有心靈上既創傷, 及時修補
紙巾---會流汗 如面對失敗可能會流淚
橡筋---處理事情要有彈性, 讀書會有壓力,
有壓力要識得放鬆, 如果唔係條橡筋就會拉斷

估唔到區區幾個常用物品應用於學習方面原來有另一番意義, 好有意思

處理完班務小息, 落禮堂門口等入去參加開學禮
嗰陣時有幾位同學向我HI
因為我第一日入黎呢間學校係全部學生都唔識, 所以我好驚訝
估唔到同我同班既同學都幾主動向我打招呼
然之後就入去開始開學禮,
首先唱校歌, 唔識唱, 之後聽校長講野
呢個校長比我既印象係好開朗, 成日都笑
睇埋佢既談吐, 樣子, 我覺得佢唔似一個校長-V-
由於今年呢間學校好著重責任感等等既野
所以佢又舉左例去引證比我地聽
另外, 開學禮仲講左校園設施既改變、新老師、會退休既老師
會考頭幾名、分享勁人讀書方法、介紹社工等等

到最後仲搵老師放五顏六色既紙碎廢祝新一年開學, 好搞鬼