事緣是這樣的：琴日我放學打比呀媽話，因為我今日要考試，所以我想去補習社同miss講琴晚請一日假，聽完電話就諗起下星期三都要考試喎，心諗不如請埋下星期二晚個假啦，咁就決定左去補習社同miss講話我請兩堂假。然之後番到屋企同呀媽講番，點知佢開始鬧我：「做咩要一連氣請兩日假？咁你會跟唔到進度，灑哂啲錢，叫miss點幫你補咁多日堂？如果係咁早知就唔好補呢個3月份。你請一日我仲可以接受，但以讀書為理由請兩日假我就唔會比囉…更何況你考過一次，而考之前更加應該溫哂書架啦。既然係咁，你應該用星期六同星期日既時間好好咁溫哂佢，咁下星期咪唔駛請假囉…我發覺你而家同老豆一樣樣，樣樣野都自把自為唔問過我想點就點，我唔想你咁樣呀知唔知呀！…」跟住佢又再鬧，我已經ae都無得ae，仍然用平靜既語氣應佢(其實嗰陣時我應承左佢同補習社講番改請一日假之後cut線就一了百了)。點知佢越鬧越勁，我開始唔耐煩，我對佢既態度亦開始強硬…直到佢鬧我呢樣「你係咪咁既態度呀？」，我即刻話番佢「咁你個態度又可唔可以好啲呀？」 …「你講咩野話？！」跟著cut我線。

琴晚佢都幾晏先番屋企，點知佢無再鬧我，只係叫我飲埋啲隔夜湯，我仲以為佢會同我講番補習請假既事。佢既心情亦同平時差唔多，只係無鬧人。今朝都係咁，同佢一齊出門口都無乜事。

咁先至弊，我真係怕佢憑我一句「咁你個態度又可唔可以好啲？」，從此以後唔再鬧我。再睇多幾日先啦，我猜測佢可能怕影響到我考試心情先咁o者。

講番單野，我的確係有做錯，我知道啲補習學費係我呀媽既，所以應該事前同呀媽商量，我亦知道呀媽好緊張啲錢，因為身家唔多先咁緊張。我真係千算萬算都算唔到呀媽會有咁激烈既反應。

雖然我做錯，但我認為我唔需要道歉，亦無人需要道歉。因為我未試過比人咁樣cut線法，如果我cut呀媽線我就真係錯哂。我都係迫不得已先衝口而出咁出言窒呀媽，因為呢淡氣我都忍左好耐，成日咁比呀媽鬧，可能我係青少年開始反叛啦。但我肯定自己既係，而家我一定唔會好似細個咁，一比人(包括屋企人)鬧就做縮頭烏龜，我唔會放肆串串共，反而會盡量避免有類似既事發生。

唯有希望日後我比屋企人鬧會學懂克制啦，我今次只係一時衝動。我仍然相信比屋企人鬧既目的係為我好。最後希望呀媽經過呢件事有諗到呢個道理「兩母子邊有隔夜仇丫」。