|
中四最後一日
有好多野好多野講都講唔到
都唔係講就可以講得清
升中咁耐,四年之中今年算最有意義
亦係最多淚水既一年
雖然都唔係好多,好少姐-v-
不過...今日真係肯定係我小五以黎第一次o係學校喊到咁
我記得上年同一個時候,
我唔記得係唔係都係7月11號
但係都同樣係上年既最後一日上學日
我都係食完晚飯就走左上床度喊到收唔到聲
喊到對眼腫晒
但係今年同上年情況唔同
上年我喊到咁係因為英文總成績唔合格
我好唔開心,,我嬲自己都怨老師
愈諗愈唔開心,愈諗愈嬲
但今年唔同,今年係真正既傷感
百感交雜,感到後悔,感到不捨
嬲自己過去一年唔識諗
嬲自己過去一年冇認真看待art work
嬲自己過去一年冇積極做好本份
嬲自己既無知,幼稚
嬲自己唔知人地幫自己幾多
嬲自己蠢
四年黎我唔可以話我冇討厭你既時候
尤其係當你話我唔係現代人既時候
話我有寶唔識執,呢種學習態度唔得既時候
我覺得自己受左委屈,因為事實根本唔係你睇到既咁樣
但係我依覺得你係好老師
我都仲知道你有好多野要做
四年黎你講左好多野我知道我會記一世
特別係今日你走之前都要鬧醒我地
講左一番我永遠記得,我會時時諗既說話
你叫我地唔好再咁幼稚要成長
要成長要信自己要靠自己唔好睇死自己唔好好高驁遠
唔好驚驚青青縮埋一邊驚俾人鬧
唔好做到最後差一步覺得自己唔得就放棄佢
唔好等到d野到最後一分鐘先識得黎認真緊張
唔好因為自己懶而以為自己冇能力
要知道人地為自己付出幾多
有幾多人幫自己,人地o係背後做左幾多野我地係唔知
要學識不停向前跑,唔好企o係度等人陪自己
要識得將勤補拙
你話去到最前做左第一既時候會好孤獨
但唔可以停落黎唔可以向後望
因為前面仲有好多個第一
一向後望就會輸,輸幾多都係輸
學識左咩係錯既就套用將來唔好再錯
你用心良苦,一年黎你保持住嚴肅既形象
(雖然你不嬲都係呢個style @@)
明明可以早一年退休都留o係度幫我地一年
要操勞多一年
出心出力幫我地催谷我地
用各種方法都要托起我地d art work成績
要我地學習任何事都會有佢既時限
每個人都要有佢既時間表
唔好奢望老師會永遠等你
唔會永遠有人幫你,人地幫你係義務
要做一個學生喜愛既老師好難
要做好多好多野...
但好多學生唔會理解唔會欣然接受既野
都係一d不受學生歡迎既老師所做既
我從來冇試過因為一個老師而喊到咁
我印象中我咁耐以黎唔計今次
只係小二果年要轉校升小三
離開元朗朗屏邨東莞學校下午校
冇機會再見到蔡徐耀老師既果一刻
我果日連散學禮都唔可以逗留到最後一刻
我好唔開心我好唔捨得我好鍾意東莞學校我好鍾意蔡老師
但我的確係要離開
今日你話總會有離別既時候
唔好因為離別而喊
要笑住咁送你走
=] 希望你退休生活愉快
劉金鳳老師
今年走好多好老師 
校長
文sir
鄧sir
謝sir
盧sir
魚蛋sir
miss lau
miss fung
mrs sharada
關老師 (除左佢我係唔識的)
合共10人!
魚蛋都走....
希望作為老師既佢唔會再俾學生話 =口=
仲有沒使再做埋咁多老師唔需要做既野
記住你係老師黎
不過睇起黎,,視覺藝術科既兩位老師都走
係最令人吃驚的吧?
雖然喇話謝sir走果陣係全場嘩然 -_-
不過低forn果場就係講miss lau走果陣全場都yes
好慘喔miss lau =口=!!!
好彩佢冇黎到散學禮..(都係因為我地-v-)
文sir...雖然冇俾佢教過,
不過我仲記得之前中文曹劌論戰廣播劇
你有份客串犧牲的士兵xd
好好笑....
今日係最後一日上課,
但完全冇feel
返到學校就搵陳美老師
好彩今日落雨唔使早會-口-
之後就要早d上禮堂準備中文學會廣播劇個頒獎
o係hall度等,聽校長講野...
超搞笑xd校長講緊野果陣某個阿sir o係度做左d野
呵呵呵..校長睇黎走得好
校長講左今年走d老師既時候
可能因為現場既係低form
唔太認識d老師
所以反應唔大,,,相反我同suki就好激動
跟住就到我地頒獎既時候喇
請左miss fung頒
好快地頒兩個獎就ok
跟住急call我地上去課室影班相
好正喔!影左班相....
岩岩好趕得到
之後又要走言落hall準備再頒獎
不過最後都係唔頒喇
落返去同班坐 =]
始終係散學禮嘛,梗係同自己班過
跟住最後一場
台上要走的老師都有d唔開心咁
不過呢個時刻並唔係是日精華
完左散學禮就去ART室
miss lau話臨走都要鬧醒我地 =]
miss擺我地做第一,會都唔去開
佢講完之後就放lunch
lunch完左3:30再返去做ART
好啦,,時候尚早
我同lum,嘉恩去左味太郎食lunch
之後仲有兩個鐘時間-3-
上左康屋企坐
訓左覺..太眼訓了啦,又冇野做
之後3:15左右就閃返學校喇
跟住都唔知自己o係度做乜
咩都誂唔到,第6件野我拖左好耐都未做好
我好蠢囉,,,,,好想沖自己落屎坑囉頂
跟住miss明明話最遲5:30要走,
因為佢約左人....但係佢都留到7點幾
原因係佢要教好我地
本來佢係話我地差唔多要走喇
交低未來一年既事....果陣大家都停晒手
(唯獨係開頭嘉恩仲係o係度整緊佢張卡( =口= )
後尾miss講左好耐,大家都聚埋過黎聽
講到點幾 =] 開頭都冇咩野
但係愈聽就愈想喊,我都唔知點解要喊
本來都冇事架嘛
見到人地喊我又喊喇
到最後,,ART室充滿住淚水
(會唔會誇張左d呢,,應該冇)
miss叫我地唔好喊
呵呵,,我係咁.....愈叫我唔好喊我愈喊得勁
所以我喊緊果陣大家唔好叫我唔好喊
仲記得上一次喊
有人叫我唔好喊啦
結果我真係愈喊愈勁
就因為咁,當miss叫唔好喊果陣我果下d淚水係湧出黎
好樣衰呀-口-我差d就喊埋出聲添
之後勁逼自己唔好再流眼淚
忍到一陣,,結果都係不停流流流
最後miss叫我地走lu~
佢話如果想話叫佢幫我地印野
就放去學校file度,幫我地睇下d位果d
我放左去file之後,,就走喇
miss lau....
其實每一次完左ART放學我都好想同佢講BYE BYE
但每一次都冇講到出口
連最後一次機會講,我都冇講到 =]
算啦...
返到屋企依然係諗住ART室既事
唉.........喊完跟住玩電腦
同人吹左陣水之後就訓lu~
暑假終於到,可能係我最後一個暑假喇
要努力!
|
